Եկատերինբուրգի բնակիչ Գլեբ Մահնևի համացանց տեղադրած լուսանկարը, որում պատկերված է «Airbus 321»–ը՝ պոչային մասում ակնհայտ ճաքով, փոթորկել է համացանցը։ Նկարի հեղինակը «Metro»–ին հայտնել է, որ օդանավը լուսանկարել է դեռ 2015թ. մայիսին Շարմ–էլ–Շեյխի օդանավակայանում։

«Ես ինքնաթիռների արհեստավարժ լուսանկարիչ եմ։ Ողբերգությունից հետո ման եկա իմ արխիվներում և գտա այդ նկարները։ Այնուհետև պոչի մասը համեմատեցի տարբեր տարիներին արած մյուս լուսանկարների հետ։ Ցավոք, ես ինքնաթիռների մասնագետ չեմ և չեմ կարող գնահատել՝ ճա՞ք է դա, թե՞ ինչ–որ բանի ցոլք։ Բայց նկատեցի, որ տարբեր նկարներում այդ «առանձնահատկությունը» միշտ նույն տեղում է»,–պատմել է «Metro»–ի զրուցակիցը։

Գլեբի լուսանկարում նկատվում է «EI-ETJ» համարը, որը համընկնում է Եգիպտոսում վթարված ինքնաթիռի համարի հետ։

Փորձագետները ներկայումս А321–ի կործանման 3 վարկած են դիտարկում՝ ռումբի պայթյուն անմիջապես օդանավում, շարժիչի մասերի պոկվածք և ինքնաթիռի կորպուսի վրա ճաքի գոյացում։

Ճաքի առկայության վարկածի կողմնակիցն է «2Т-Инжиниринг» ընկերության կոնստրուկտոր Իգոր Տաբաչուկը։

«Հավանաբար, ճեղք է եղել, որից մարդիկ հոսքով դուրս են քաշվել»,– «Говорит Москва»–ին է ասել մասնագետը։

Ամերիկյան «Stratfor» ընկերությունն էլ կարծում է, որ վթարի պատճառն ահաբեկչությունն է եղել։ Ըստ փորձագետների՝ ինքնաթիռի կորպուսի «ինքնուրույն» կործանումը հազվագյուտ երևույթ է։

7or.am