Լրագրողների հետ հանդիպման ժամանակ անդրադառնալով Սփյուռքի նախարար Հրանուշ Հակոբյանի վերջերս առաջ քաշած՝ սփյուռքի ներկայացուցիչներին ներգրավելու համար երկպալատանի խորհրդարան ստեղծելու գաղափարին՝ բանաստեղծ, ԱՄՆ-ում Արցախի առաջին ներկայացուցիչ Արտեմ Հարությունյանն ասել է, թե իր կարծիքով հարցական է՝ սփյուռքի ներկայացուցիչների համար ստեղծվող այդ կառույցն արդյոք կարդարացնի՞ իրեն, թե՞ ոչ։

-Սփյուռքը կարիք ունի ոչ թե այստե՛ղ կոմիտե ունենալու, այլ Նյու Յորքում, Վաշինգտում և այլ երկրներում։ Եվ պարտադիր չէ, որ այդ կառույցի ներկայացուցիչները հայ լինեն։ Մեզ օգնող, օժանդակող խումբ պետք է լինի։ Ինչպես առաջարկում էր հռչակավոր Փիթեր Բալաքյանը՝ դիմել մարդկանց, ովքեր փողով կլծվեն աշխատանքի,-նշել է նա։

Ըստ Արտեմ Հարությունյանի՝ զուտ անձնական նախաձեռնություններով, սփյուռքահայի դողդոջուն ձայնով հնարավոր չի լինի արդյունքի հասնել։

-Պետք է վիթխարի գումար ներդրվի, և սփյուռքը կարող է ինքն իրեն գումարով ապահովել ու լուրջ գործեր, լոբբիստական աշխատանքներ տանել։ Թե չէ, այստեղ տեղի գործիչները չեն թողնի այն թափով մասնակցել գործընթացներին, ինչ որ պետք է։ Նրանք ավելի լավ է դրսում լինեն։ Այստեղ գալը դառնում է մի տեսակ տուրիստական ճամփորդություն։ Այլապես եթե այստեղ լինի, մենք կունենանք հերթական բյուրոկրատական կառույցը ու կգնանք ճահճացման,-ընդգծել է նա։

7or.am