Նոյեմբերի 25-ին ՀՅԴ «Նիկոլ Աղբալյան» ուսանողական միությունը Երևանի ճարտարագիտական համալսարանի մոտից դեպի ՀՀ կառավարության շենք երթ էր կազմակերպել՝ ընդդեմ Նոյեմբերի 17-ին ՀՀ կրթության և գիտության նախարար Արմեն Աշոտյանի որոշման, որի համաձայն նախատեսվում է ուսանողներին զրկել կրթաթոշակից։ Գործողությանը մասնակցել են «Նիկոլ Աղբալյան» ուսանողական միության, ՀՅԴ Դաշնակցության երիտասարդական միության անդամները, ինչպես նաև «Ժառանգություն» կուսակցության անդամ ուսանողները։ ՀՀԿ, ԲՀԿ և ՕԵԿ ուսանողական միությունները գործողությանը չեն միացել և, ինչպես տեղեկացրել է ՀՅԴ «Նիկոլ Աղբալյան» ուսանողական միության վարչության ներկայացուցիչ Հարություն Մելիքյանը, ուսանողական խորհուրդները լուրջ աշխատանք են տանում՝ խոչընդոտելու միջոցառման անցկացումը։

-Ուսանողության միջազգային օրը Արմեն Աշոտյանը հայտարարեց, որ ցանկանում է վերացնել ուսանողների կրթաթոշակները և դրա փոխարեն ստեղծել նոր ոչ կոմերցիոն հիմնադրամ, որին մենք դեմ ենք։ Մենք դեմ ենք, որ ուսանողության կրթաթոշակները կտրվեն,- «7օր»-ին ասել է Հարություն Մելիքյանը։

Միջոցառման մասնակիցները նամակ են հանձնել ՀՀ վարչապետին։

7or.am