Ինչպես արդեն հայտնել էինք, ՀՀ կառավարության նախաձեռնությամբ՝ այսօր գումարվել է Ազգային ժողովի արտահերթ նիստ։ Քվեարկության է դրվել «Հայաստանի Հանրապետության կառավարության կառուցվածքի մասին» Հայաստանի Հանրապետության օրենքում լրացում և փոփոխություն կատարելու մասին նախագիծն օրակարգ ընդգրկելու հարցը, որով առաջարկվում է տարանջատել Տարածքային կառավարման և արտակարգ իրավիճակների նախարարությունները:

«Օրինաց երկիր» խմբակցության պատգամավոր Հովհաննես Մարգարյանը վարման կարգով իր ելույթի ժամանակ նշել է, որ ՕԵԿ-ի համար անհասկանալի է առաջարկվող նախագիծը, հետևաբար կուսակցությունը չի մասնակցի քննարկմանը:

ԱԺ արտահերթ ռեժիմով նման նախագիծ բերելն անհասկանալի է համարել նաև «Հայ ազգային կոնգրես» խմբակցության ղեկավար Լևոն Զուրաբյանը.

«Սա անհարգալից վերաբերմունք է պատգամավորների նկատմամբ. այսքան ձգձգելուց հետո ի՞նչն էր խանգարում քննարկել նախագիծն առաջիկա նիստում»:

Նիստը վարող ԱԺ փոխնախագահ Էդուարդ Շարմազանովը նկատել է, որ դա կառավարության իրավունքն է:

Առաջարկն ընդունվել է 73 կողմ, 0 դեմ, 7 ձեռնպահ ձայների հարաբերակցությամբ: