Այսօր Երևանում կկայանա Հավաքական անվտանգության պայմանագրի կազմակերպության Խորհրդարանական վեհաժողովի (ՀԱՊԿ ԽՎ) խորհրդի արտագնա նիստը։

Ռուսաստանի Դաշնային ժողովի Պետդումայի նախագահ Սերգեյ Նարիշկինը մարտի 11-12-ին Հայաստանում կլինի՝ նախագահելու ՀԱՊԿ ԽՎ խորհրդի արտագնա նիստը։

Ռուսական լրատվամիջոցների փոխանցմամբ՝ ՀԱՊԿ–ի անդամ երկրների արտգործնախարարների խորհրդի և պաշտպանության նախարարների խորհրդի ներկայացուցիչները քննարկելու են Կովկասում ռազմաքաղաքական ընթացիկ իրավիճակը, ահաբեկչության դեմ պայքարի, ծայրահեղականությանը հակազդելու, տեղեկատվական ու պարենային անվտանգության, ինչպես նաև թմրաբիզնեսի դեմ պայքարի հարցեր։

Հիշեցնենք՝ 2016 թվականին ՀԱՊԿ-ը նախագահում է Հայաստանը։ Հավաքական անվտանգության պայմանագրի կազմակերպության անդամ են նաև Ռուսաստանը, Բելառուսը, Ղազախստանը, Տաջիկստանը և Ղրղզստանը։

ՀԱՊԿ գլխավոր քարտուղարի պաշտոնում ևս մեկ տարի կշարունակի մնալ Նիկոլայ Բորդյուժան։

7or.am