Եթե իշխանությունները չգողանային, այս վիճակը չէր լինի, իսկ կառավարման համակարգ, որպես այդպիսին, գոյություն չունի. պարզապես մենք ենք անվանում կառավարում: Սակայն Հայաստանի իշխանություններն առաջվա նման իրենց են պատկերացնում համախմբման ղեկավարի պաշտոնում: Այս մասին այսօր լրագրողների հետ զրույցում ասել է տնտեսագետ Վարդան Բոստանջյանը:

«Ո՞ւմ շուրջը համախմբենք ջանքերը: Տեսեք, թե պանամական սկանդալում ինչ տեղերում են հայտնվել մեր պաշտոնյաները: Բոլորովին էլ ոչ վերջին: Թե նրանք ինչպես են վաճառել պետական ունեցվածքը, ինչ աչք ծակող էժան գնով: Նրանք ի՞նչ են արել, որ մեր տնտեսությունն ուժեղանա, որ արտասահմանում հաշվի նստեն մեզ հետ: Վերցրեք թեկուզ Որոտանի կասկադը, որը վաճառել են 180 մլն դոլարով կամ էլ Կենտրոնական բանկի համալիրը Դիլիջանում», -նկատել է բանախոսը։