Այսօր լրագրողների հետ հանդիպմանը ԱԺ փոխնախագահ, ՀՀԿ մամուլի խոսնակ Էդուարդ Շարմազանովին հիշեցվել է, որ նա Լևոն Տեր–Պետրոսյանին անվանում էր քաղաքական թոշակառու և անսկզբունքային գործիչ, իսկ հիմա ողջունում է այդ նույն գործչի հետ Սերժ Սարգսյանի հանդիպումը՝ նշելով, թե դա ներազգային համախմբման նպատակ ունի:

Հարցին՝ կարո՞ղ ենք արձանագրել, որ Սարգսյան-Տեր-Պետրոսյան հանդիպումից հետո ձեր կարծիքը կտրուկ փոխվեց, նա պատասխանել է.

-Իմ կարծիքը կտրուկ փոխվեց գործողության հետ կապված: Ես անձին չէ, որ գնահատական եմ տվել, երևույթին եմ գնահատական տվել և՛ նախկինում, և՛ հիմա: Ես շատ փոքր մարդ եմ, որպեսզի երկրի առաջին, երկրորդ կամ երրորդ նախագահին գնահատականներ տամ: Ինձ դուր է գալիս թե ոչ, նրանք իմ երկրի նախագահներն են և նախագահի ինստիտուտը, գոնե իմ կողմից, մշտապես արժանացել է հարգանքի: Այսօր ես կրկին երևույթն եմ գնահատում, որը արժանի է հարգանքի: Դա պետական մտածողություն է, որը դրսևորեց առաջին նախագահը: Եթե որևէ մեկը մտածում է, որ դա պետական մտածողություն չէ, ես ցավում եմ:

Շարմազանովը նաև ընդգծել է, որ այլ ճանապարհ չկա, այդպես էլ պետք է լիներ, և ինքն առաջին նախագահից այլ բան չէր էլ սպասում:

«Vesti.am»-ի հարցին՝ այդ ներազգային համախմբման շրջանակներում ՀՀԿ–ն համաձա՞յն է ԼՂ–ի տարածքների հանձնմանը և խաղաղապահների տեղակայման տարբերակին, թե՞ ԼՂ-ի խնդրի լուծման այլ տարբերակ է տեսնում, Շարմազանովը պատասխանել է, որ խաղաղապահների հարցը համապարփակ լուծման մի գործոնն է:

-Խաղաղապահների հարցը, իհարկե, հաջորդելու է կարևորագույն խնդիրները լուծելուց հետո: Հիմնական խնդիրը պատճառների վերացումն է, ոչ թե հետևանքների: Խաղաղապահները պատճառը չեն վերացնելու, իսկ պատճառն այն է, որ Ադրբեջանն ագրեսիա է իրականացնում. Ադրբեջանը չի համակերպվում Արցախի ժողովրդի ինքնորոշվելու օրինական պահանջի հետ: Թիվ մեկ խնդիրը կարգավիճակի հստակեցումն է: Շատ լավ է, որ համանախագահները նաև Երևանում նշեցին, որ, այո՛, առանց Արցախի իշխանությունների՝ որևէ համաձայնագրի մասին խոսք լինել չի կարող: Խաղաղապահների թեման ամբողջ հարցի ընդամենը մի շտրիխն է, որը վերջնական փուլում պետք է լինի, և դրան պետք է հասնել,-ասել է նա՝ հավելելով, որ պետք է Ադրբեջանը հասկանա՝ ԼՂՀ ժողովուրդը այլևս երբեք Ադրբեջանի կազմում չի լինելու, որը նաև արցախահայության խոսքն է, իսկ ՀՀ-ն, որպես ԼՂՀ անվտանգության երաշխավոր, պարտավոր է իրականացնել և պահպանել Արցախի ժողովրդի արդարացի պահանջը:

Դիտարկմանը, որ Սերժ Սարգսյանի ու Լևոն Տեր-Պետրոսյանի հանդիպման փակագծերը բացվեցին Տեր-Պետրոսյանի կողմից, և անհրաժեշտություն կա մյուս կողմից էլ իմանալ, թե ինչի մասին են խոսել այդ հանդիպման ընթացքում, այն դեպքում, երբ Ղարաբաղի հարցը ժամանակին շատ հրաժարականների առիթ է դարձել, Շարմազանովը պատասխանել է.

-Նախագահի աշխատակազմը օրենքով սահմանված կարգով տալիս է այն ինֆորմացիան, որն անհրաժեշտ է. ձեզ համար այդ ինֆորմացիան քիչ է, ինձ համար գուցե շատ է,-ասել է նա:

«Vesti.am»