Սելֆորդի համալսարանի գիտնականները մի շարք ուսումնասիրությունների ընթացքում եկել են այն եզրակացության, որ շփումը սոցիալական ցանցերում, օրինակ՝ «Ֆեյսբուքում» կամ «Ինսթագրամում», կարող է ընկճախտի պատճառ դառնալ:

Ինչպես տեղեկացնում է «Life»-ը, հետազոտությունների միջոցով հաջողվել է պարզել, որ սոցցանցերում մեկ շաբաթ անցկացնելուց հետո ընկճախտի մակարդակն աճել է:

«Բոլոր նրանց մոտ, ովքեր հաճախ ենք օգտվում սոցցանցերից, կարող է նախանձի զգացմունք առաջանալ սոցցանցի ընկերների հանդեպ: Օրինակ՝ ցուրտ ու անձրևոտ եղանակին դուք նստած եք տանը, իսկ համացանցի նորությունների ձեր ժապավենում հայտնվում են ակումբներում զվարճացող կամ լողափերում հանգստացող ձեր ծանոթների նկարները», - պարզաբանում են գիտնականները:

Ըստ նրանց՝ թեև սոցիալական ցանցերն օգնում են մեզ միշտ կապի մեջ լինել, սակայն պետք չէ մոռանալ, որ այնտեղ հայտնված նկարներն արվում են մարդկանց կյանքի լավագույն պահերին:

«Մեզանից շատերը կնախընտրեն տեղադրել նկար, որն արված է ինչ-որ խնջույքի, այլ ոչ թե գիշերազգեստով աման լվանալու ժամանակ: Իսկ նրանց մոտ, ովքեր այդքան էլ գոհ չեն իրենց կյանքից, կարող է տպավորություն ստեղծվել, որ շրջապատում բոլոր մարդկանց կյանքն ավելի հետաքրքիր է և լավը», - եզրակացնում է Սելֆորդի համալսարանի դասախոս Մարկ Վիդոուսոնը:

7or.am