Սյունիքի մարզի ընդհանուր իրավասության առաջին  ատյանի դատարանի վարույթում է գտնվում պաշտոնեական լիազորությունները չարաշահելու համար Մեղրիի նախկին քաղաքապետի նկատմամբ հարուցված քրեական գործը: 

ՀՀ ոստիկանության Սյունիքի մարզի քննչական բաժնում քննված քրեական գործով պարզվել և հիմնավորվել է, որ  Մեղրիի նախկին քաղաքապետ Միշա Հովհաննիսյանը, խախտելով «Անշարժ գույքի գնահատման գործունեության մասին» ՀՀ օրենքը, (օրենքի 8-րդ հոդվածի 1-ին կետը, այն է' «Պետական կամ համայնքային սեփականություն հանդիսացող անշարժ գույքի օտարման դեպքում անշարժ գույքի գնահատումը պարտադիր է») քաղաքապետարանի հաշվեկշռում գտնվող,  քաղաքապետարանի վարչական շենքի  189,2 քառակուսի մետր տարածք ունեցող դահլիճը ՝ 5.675.000 ՀՀ դրամ շուկայական արժեքով,  2005թ. դեկտեմբերի 20-ին վաճառել է իր եղբորը' Ռ. Խուդյանին' ակնհայտ ցածր գնով, ընդամենը  567.000 ՀՀ դրամով:

Բացի այդ, 16 մլն ՀՀ դրամ շուկայական արժեք ունեցող  համայնքային  սեփականություն հանդիսացող Մեղրիի նախկին  խճաքարի գործարանի հարեւանությամբ գտնվող 5 հա արտադրական նշանակության եւ 7.5 մլն ՀՀ դրամ շուկայական արժեք ունեցող  15 հա  գյուղատնտեսական այլ նշանակության հողատարածքն ակնհայտ ցածր գնով՝ համապատասխանաբար 13.860.000 և 551.250 ՀՀ դրամով վաճառել է ավագանու անդամ Ս. Համբարձումյանին:

Նախաքննական մարմնի գնահատմամբ՝ Մ.Հովհաննիսյանը, անձնական շահագրգռվածությունից ելնելով, պաշտոնեական դիրքն օգտագործել է ծառայության շահերին հակառակ, որի հետեւանքով  համայնքին պատճառվել 14.196.750 ՀՀ դրամի վնաս:

Ձեռք բերված ապացույցների հիման վրա' Մ. Հովհաննիսյանին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին մասով: Նախաքննության օրինականության նկատմամբ հսկողություն իրականացնող դատախազը հաստատել է մեղադրական եզրակացությունը: