Այսօր՝ ժամը 10։00-ից, ՀՅ Դաշնակցության մի շարք ակտիվիստներ Սահմանադրական դատարանի առջև բողոքի գործողություն են սկսել։ Մասնավորապես ՀՅԴ խմբակցության ղեկավար Վահան Հովհաննիսյանը նշել է, որ հայ-թուրքական արձանագրություններում  կան մի շարք կետեր՝ սահմանի ճանաչում, Հայոց ցեղասպանության ճանաչման հարցը խոչընդող հանձնաժողովի ստեղծում, որոնց վերաբերյալ կարելի է վերապահումներ կատարել, ինչը նաև չի հակասում միջազգային օրենսդրությանը։

Ըստ Վ. Հովհաննիսյանի՝ ՍԴ-ն կարող է արձանագրությունները կա՛մ ճանաչել Սահմանադրությանն ամբողջությամբ համապատասխան, ինչը, նրա խոսքերով, անհեթեթություն է, կա՛մ ճանաչել չհամապատասխանող, կա՛մ էլ՝ մասնակի չհամապատասխանող։ Թե այս տարբերակներից որը կընտրի ՍԴ-ն, Վ. Հովհաննիսյանը դժվարացել է պատասխանել։

Իր հերթին Ժողովրդական կուսակցության նախագահ Տիգրան Կարապետյանը, նկատի ունենալով հայ-թուրքական արձանագրություններում առկա նախապայմանները, ասել է, որ եթե ՍԴ-ն հաստատի արձանագրությունների սահմանադրականությունը, ապա դա թուրքերին առիթ կտա որոշ ժամանակ անց ասել, թե Հայաստանը սահմանդրորեն ևս հաստատել է այդ արձանագրությունները։

7or.am