-Չէի ասի, որ քաղաքականության մեջ որևէ բան բացառում եմ, բայց ես համոզված եմ, չգիտեմ՝ ինչու, որ, ի վերջո, մենք չպետք է առևտրի առարկա դարձնենք այն հաղթանակները, որոնք ակնհայտ են, և հայ ժողովուրդն այդ հաղթանակի տերը պետք է լինի,- արցախյան հիմնախնդրի վերաբերյալ շրջանակային համաձայնագրի հնարավորության մասին խոսելիս ասել է Տիգրան Կարապետյանը՝ նշելով, որ եթե ինքներս կասկածի տակ ենք դնում մեր հաղթանակները, ապա մեզ թշնամի պետություններն առավել ևս կասկածի տակ կդնեն։

Նա նշել է, որ եթե մինչ այսօր արցախյան հիմնախնդրի լուծումն այսքան ձգձգվել է, ուրեմն կան կետեր, որոնք սկզբունքային են, հետևաբար այդ հոծ գիծը ոչ ոք չի անցնի։

Ինչ վերաբերում է նախատեսվող Սարգսյան-Ալիև հանդիպման սպասելիքներին, Տ.Կարապետյանն ասել է, որ ոչ մի սպասելիք չունի.

-Ալիևը շիզոֆրենիկի նման պնդում է, որ Արցախը պետք է լինի միայն իրենց պետականության ներքո։ Սերժ Սարգսյանն ու Ալիևը 2009-ին վեց անգամ են հանդիպել, 2010-ին թեկուզ 16 անգամ էլ հանդիպեն, եթե Ալիևը նույն մոտեցումն առաջ քաշի, ոչ մի առաջընթաց չի լինի,- ասել է Տիգրան Կարապետյանը։

 7or.am