Մեկօրյա աշխատանքային այցով Երևանում է Վրաստանի վարչապետ Նիկա Գիլաուրին՝ մասնակցելու Հայ-վրացական տնտեսական համագործակցության միջկառավարական հանձնաժողովի 8-րդ նիստի աշխատանքներին։

Ի դեպ, Հայաստանի հանրապետական կուսակցության անդամ, «Ջավախք» հայրենակցական միության  նախագահ, «Հզոր հայրենիք»  կուսակցության նախագահ Շիրակ Թորոսյանի, ինչպես նաև ջավախահայության հարցերը չեն քննարկվել: Այս մասին «7օր»-ին ասել է Հայ-վրացական գործարար համագործակցության ասոցիացիայի համանախագահ, ՀՀԿ խմբակցության անդամ Վոլոդյա Բադալյանը։

-Դա մասնավոր հարց է։ Ինձ թվում է՝ միջկառավարական հանձնաժողովում այդ կարգի հարցեր չեն քննարկվում,- պատասխանել է Վ. Բադալյանը։

Հիշեցնենք, որ 2009-ին Շ. Թորոսյանին չէր թույլատրվել հատել հայ-վրացական սահմանը։

Վ. Բադալյանն ասել է նաև, որ Հայ-վրացական տնտեսական համագործակցության միջկառավարական հանձնաժողովի 8-րդ նիստի օրակարգում չի եղել նաև Ջավախքի հարցը։

-Իմ կարծիքով Ջավախքի համար այսօր կարևորագույն  հարցը ճանապարհի կառուցումն է, որը կբերի ինֆրաստրուկտուրայի բոլոր կառույցները, որից կօգտվի նաև ջավախահայությունը։ Մենք պետք է  մտածենք այդ ուղղությամբ։ Այսօր նաև հիմնականում պետք է լուծվի դեպի ծով դուրս գալու կարճ ճանապարհի խնդիրը, որը պետք է անցնի Ջավախքի տարածքով,- ասել է նա։

Փոխարենը կողմերը փոխհամաձայնության են եկել Սուրբ Գևորգ եկեղեցում վերականգնողական աշխատանքներ իրականացնելու մասին։

7or.am