Պետական եկամուտների կոմիտեի 7 մլրդ դրամի հարկային պարտավորության պահանջը ուռճացված է։ «Սպայկա» ընկերության տնօրեն Դավիթ Ղազարյանի խոսքերով՝ 7 մլրդ դրամի պարտքն ընկերությանը «կպցրել» են պատվիրված փորձաքննության հետեւանքով։

«Թիվը ուռճացրել են, որպեսզի ժողովրդի համար սիրուն լինի, որ ժողովուրդը ՊԵԿ-ի կողքին լինի, 7մլդ-ից 5,5-ը ավելացված արժեքի հարկն է։ Այդ ապրանքը եկել և գնացել է ԵԱՏՄ: Այս շինծու թիվը՝ 7 մլրդը, իրականությանը չի համապատասխանում»,-ասաց Ղազարյանը։

«Նախ՝ անհասկանալի է, թե որտեղից է վերցվել գումարը։ Դա հիմնավորվում է նրանով, որ ընկերությունը կապված է «Վիլլաջ» եւ «Գրին պրոդուկտ» ընկերությունների հետ։ Դա անհեթեթություն է, մենք կապված ենք միայն նրանով, որ նրանց տրանսպորտային ծառայություններ ենք մատուցում։ Երկրորդ՝ անհասկանալի է որտեղից է վերցվել մնացած 1,5 մլրդ-ն։ Երրորդ, եթե գումարը 5,5 մլրդ-ի մասին ճիշտ է, ապա ինչո՞ւ ընկերությունը դրանք որպես հետվճար չի ստացել»,-նշել է նա։

Ընկերության տնօրենի խոսքերով՝ դա, հավանաբար, նրա արդյունքն է, որ ժամանակին արդեն 2.45 մլրդ դրամի չափով չճշտված գումար են վճարել եւ այն էլ՝ ընկերությանը փրկելու համար:

«Դա սովորություն է դարձել, որպեսզի մեր ընկերության վրա ավելի մեծ գումար բարդեն»,-ընդգծեց Դավիթ Ղազարյանը:

Նա քաղաքական որևէ ենթատեքստ չի տեսնում, փոխարենը սկատարվածը որակեց ՊԵԿ-ի կողմից հետապնդում «Սպայկայի» նկատմամբ՝ նշելով, որ դրա հետեւանքով ընկերությունը զրկվել է ֆինանսական կազմակերպություններից գումար ստանալու հնարավորությունից, որի հետեւանքով «Սպայկա»-ն ճգնաժամի մեջ է հայտնվել: Ավելին՝ Եվրասիական զարգացման բանկը կասեցրել է վարկերի տրամադրումը, որոնք կարող էին ընդլայնել ընկերության հնարավորությունները, ինչը թույլ կտար աշխատակիցների թիվը 2000-ից 3500-ի հասցնել։

«100 մլն դոլլարը մաքսիմում երկուշաբթի օրը պետք է նստեր մեր հաշվին։ Այս ներդրումը նոյեմբերի ամսին առնվազն 1000 աշխատատեղ էր ստեղծելու, սակայն ինձ զանգահարեցին և ասացին, որ ֆինանսավորումը ժամանակավորապես դադարեցված է»։

Խոսելով այն մասին, թե արդյոք ընկերությունը կշարունակի աշխատանքը իր կալանավորման դեպքում, Ղազարյանն ասաց, որ բնականոն աշխատանքը կշարունակվի, բայց մթերում չի լինի։

Աղբյուրը՝ «Փաստինֆո»

7or.am