Թուրքիայի վարչապետ Ռեջեփ Թայիփ Էրդողանի և Պոլսոյ Ս. Փրկիչ հիվանդանոցի Հոգաբարձուների խորհրդի ատենապետ Պետրոս Շիրինօղլուի միջև մարտի 26-ին տեղի ունեցած հանդիպման ժամանակ, Շիրինօղլուի հայտարարությունը բողոքի ալիք  է առաջացրել պոլսահայերի շրջանում:
«Մենք այլ Թուրքիայում ենք ապրում»  խորագիրը կրող հայտարարության հրապարակումն ու  ստորագրահավաքը  նախաձեռնել են «Ակօս»-ի նահատակ խմբագիր Հրանդ Դինքի ընտանիքի անդամները:
Հայտարարության մեջ մասնավորապես ասված է. «Տհաճությամբ ծանոթացանք Սուրբ Փրկիչ հայկական հիվանդանոցի ատենապետ Պետրոս Շիրինօղլուի,  մարտի 26-ին Թուրքիայի վարչապետ Էրդողանի հետ ունեցած հանդիպման ժամանակ արած հայտարարությանը: Ժողովրդին սխալ մեկնաբանված այս հայտարարությունը բացատրության կարիք ունի: Շիրինօղլուն Թուրքիայի հայ համայնքի ղեկավարը չէ (թերթերն ու հեռուստաալիքներն այդպես էին նրան ներկայացրել):
Վարչապետի աշխատակազմի մամլո ծառայության հաղորդագրության մեջ, իբրև Պոլսո հայ համայնքի ղեկավար ներկայացված Պետրոս Շիրինօղլուն, այդ կարգավիճակը չունի՝ նա Պոլսոյ Ս. Փրկիչ հիվանդանոցի ատենապետն է, և այս կարգավիճակում  հայ համայնքի անունից հայտարարություններ անելու իրավունք չունի: Ուրեմն, Պետրոս Շիրինօղլուի հայտարարությունները միմիայն իր անձնական կարծիքն են: Ակնկալում ենք, որ նրանք, ովքեր թյուրիմացության կմատնեն համայնքը, կսրբագրեն իրենց այս սխալը»: Հիշեցնենք, որ Թուրքիայի վարչապետի հետ հանդիպման ժամանակ Շիրինօղլուն ասել էր. ««Չեմ կարծում, որ 1915թ. դեպքերի մասին խոսելիս արժե օգտագործել ցեղասպանություն բառը»։ Նա իր երախտագիտությունն է հայտնել հայերի հանդեպ Էրդողանի ուշադրության համար՝ հավելելով.  «Մինչև հիմա ոչ մի վարչապետ մեզ՝ ազգային փոքրամասնության ներկայացուցիչներիս հետ այնքան մոտ չի եղել, ինչպես Ռեջեփ Էրդողանը»։

Ըստ «Ակօս»-ի