Արցախի Հանրապետության նախագահ Բակո Սահակյանի ուղերձը Ոստիկանության օրվա առթիվ

Ոստիկանության հարգելի աշխատակիցներ և վետերաններ

Ի սրտե շնորհավորում եմ ձեզ Ոստիկանության օրվա առթիվ:

Գլուխ եմ խոնարհում համակարգի այն աշխատողների հիշատակի առջև, ովքեր իրենց կյանքն են զոհաբերել հանուն հայրենիքի պաշտպանության: Հավե~րժ փառք ու պատիվ նրանց:

Արդեն ավանդական դարձած այս տոնը լավ առիթ է արժևորելու կատարած աշխատանքն ու հետագա անելիքները, խորհելու բացթողումների ու ձեռքբերումների, թերացումները նվազագույնին հասցնելու, իսկ դրականը ամրապնդելու և զարգացնելու մասին:

Դուք ընտրել եք չափազանց բարդ ու պատասխանատու աշխատանք, ինչից մեծապես կախված է մեր ժողովրդի հանգիստ ու անվտանգ առօրյան և որը միշտ գտնվում է հասարակության ուշադրության կենտրոնում: Դա հատկապես կարևոր է ժողովրդավարության ուղին բռնած մեր երիտասարդ հանրապետության համար, և հենց դրանով են պայմանավորված այն պահանջները, որ դրված են Արցախի ոստիկանության առջև:

Քաղաքացիների իրավունքների ու ազատությունների պաշտպանությունը, երկրում իրավակարգի ու օրինականության պահպանումը, հանցավորության դեմ պայքարը այն խնդիրներն են, որոնց իրականացումը համակարգի յուրաքանչյուր աշխատակցից պահանջում է ամենօրյա քրտնաջան ու աչալուրջ աշխատանք, բարձր մասնագիտական պատրաստվածություն, քաղաքացիական կեցվածք ու մարդկային որակներ: Ուզում եմ վստահ լինել, որ մեր ոստիկանությունն ունի անհրաժեշտ ներուժ այս խնդիրները հաջողությամբ լուծելու համար:

Արցախի Հանրապետության իշխանություններն այսուհետ էլ կանեն հնարավորը ոստիկանների սոցիալական և աշխատանքային պայմանները բարելավելու, տեխնիկական վերազինումը արդիականացնելու, ծառայությունն ավելի արդյունավետ դարձնելու ուղղությամբ:

Հարգելի ոստիկաններ, մեկ անգամ ևս շնորհավորում եմ բոլորիդ մասնագիտական տոնի առթիվ և մաղթում խաղաղություն, քաջառողջություն ու ամենայն բարիք: