Կարծիք

19.11.2019 11:27


Առաջիկա «լայվի» սցենար

Առաջիկա «լայվի» սցենար

Բա Սերժի վախտ խի՞ չէիք 9-1 կրում, հը՞, ա՛յ պիցցա ուտողներ, ա՛յ թաքնված քոչարյանականներ, ա՛յ գոլեր գողացող մկներ, ա՛յ սրիկա միլիոնատերեր։

Ես եմ սաղ օրը լափշա կախում մարդկանց ականջներից, եկել եք ձեր սպագետտիով սատանի մայլում քյանդրբա՞զ եք խաղում։ Գնացեք ձեր կոռումպացված Բեռլուսկոնիի թեման փակեք, նոր մեզ կրեք, ա՛յ թալանչիներ։ Մարդիկ սոված են, իսկ դուք միլիոններով աշխատավարձ եք ստանում։

Համ էլ՝ սաղ էդ դատավորն էր մեղավոր, որ ամեն գոլից հետո սուլիչով վնգստում էր ու դաշտի կենտրոնը ցույց տալիս։ Թող իմ սիրելի վնգստացող դատավորները լինեին, կտենայինք, թե ով ում կպարտվեր։

Հիմա անցնեմ մերոնց։

Բա Սերժի վախտ խի՞ չէիք 9–1 պարտվում։

Էս ի՞նչ հակահեղափոխական որջ ա դարձել ֆուտբոլի ազգային հավաքականը։

Մենք ձեզ ֆուտբոլի դաշտերով կփռենք ու դարպասի շտանգեքին կծեփենք։ Մենք ձեզ Ամուլսարով վազացնել կտանք։ Մերսեդեսիս հետևից կստիպենք քարշ գալ ու սամալյոտիս հետևից կապվել։

Խաշմանյանը «սև» ա։ Վանեցյանն էլ։ Հայ ֆուտբոլիստներն էլ։ Իտալացիք էլ։ Սուդյան էլ։

Ժողովո՛ւրդ ջան, չմտածե՛ք, ամեն ինչ լավ ա լինելու։ Կարևորը՝ դուխո՛վ։ Մեկա 2050 թվին մենք ժարիտ ենք անելու աշխարհի ու եվրոպայի դաշտերում, հանդերում և բացատներում։ Եվ մենք դրանից հետո կբուրանք թարմ լավաշի մեջ փաթաթած տաք խորովածի պես…

Զուտ ձևականորեն սիրում եմ բոլորիդ, խոնարհվում եմ կոնկրետ մեկի առաջ և հպարտանում եմ ոչ բոլորովդ։

***

Պարտության հակառակ կողմը («լայվի» մեկ այլ սցենար)
—————————

Իտալիայի ֆուտբոլի հավաքականի հետ հանդիպումը հերթական անգամ ցույց է տալիս մեր թավշյա, ոչ բռնի ու ժողովրդական հեղափոխության հաղթանակը։

9։1–ը աննախադեպ է նորանկախ Հայաստանի ֆուտբոլային պատմության մեջ։

Սա մյուս 100 փաստերից մեկն է, որը մենք կյանքի ենք կոչում։

Մենք խոստացել էինք դիտարժան ու գոլառատ ֆուտբոլ ապահովել մեր հպարտ քաղաքացիների համար։ Մեր խոստումը կատարված է։ Մենք ականատեսը դարձանք 10 գոլի։ Ու կապ չունի, թե ովքեր են դրանք խփել։ Մենք խաղաղասեր ենք, ու չարժեր, որ մեր ֆուտբոլիստները տանջվեին հանուն ոչնչնի։

Տեղի ունեցածը բավարարում էր բոլոր կողմերին՝ և՛ իտալացիներին, որոնք ընդամենը 9 գոլ խփեցին, և՛ մեզ, քանզի մի ամբողջ գնդակ ուղարկեցինք իտալացիների անառիկ համարվող դարպասը։

Հակահեղափոխականները հայտարարում են, որ սա խայտառակություն է, բայց դա իրենց ջղաձգությունն է։ Նրանք չեն տեսնում, թե ինչ փոփոխություններ կան նոր Հայաստանում։ Ե՞րբ էինք մենք 10 գոլ տեսել մեկ խաղի ընթացքում։ Երբե՛ք։ Դե թող հանգիստ նստեն տեղները։

Նախկինի վերադարձ չի լինելու։ Ճղճիմ 1։0 կամ նմանատիպ այլ հաշիվներով խաղեր այլևս չեն լինելու։

9։1–ը հաղթանակ էր։ Խորովածի բույրով լցված հաղթանակ։

Եվ ուրեմն, կեցցե'նք մենք, որ դեռ կարողանում ենք հպարտ քաղաքացուն ֆռռացնել, կեցցե՛ հպարտ քաղաքացին, որը շարունակում է հավատալ ինձ, կեցցե՛ն մեր ֆուտբոլիստները, որոնք մեզ ուրախություն են պարգևում, կեցցե'ն մեր երեխաները, որոնք ապրում են ազատ, երջանիկ ու նոր վերանորոգված բնակարանում։

Անդրանիկ Թևանյանի ֆեյսբուքյան էջից

Այս խորագրի վերջին նյութերը