Լրագրողների հետ հանդիպման ժամանակ «Սթեյջ 7» արտիստների և գրողների համագործակցության կենտրոնի նախագահ Տիգրան Նալչաջյանը, խոսելով Հայոց ցեղասպանության վերաբերյալ «Հայերի դատը մարդկության դատն է» ներկայացուման մասին, ասել է, թե այն Ցեղասպանության 90-ամյակին նվիրված միջոցառումների շարքում բեմադրվել է Սանկտ–Պետերբուրգում և մեծ արձագանք է ունեցել: Բեմադրությունը նոր դերասանական կազմով Հայաստանում առաջին անգամ է ներկայացվում:

Սցենարի հեղինակն ու բեմադրիչը կինոյի և թատրոնի արտիստ Արտաշես Ալեքսանյանն է, ով նշել է, թե այն «Սթեյջ 7» դերասանական ստուդիայի շուրջ 30 սաների և արհեստավարժ դերասանների մասնակցությամբ հայ հանդիսատեսի դատին կներկայացվի ապրիլի 21–ին Հրազդան քաղաքում և ապրիլի 22–ին՝ ժամը 14։00–ին, Երևանում՝ Խ. Աբովյանի անվան մանկավարժական համալսարանի կուլտուրայի ֆակուլտետի դահլիճում։

–Սա այն ներկայացումներից է, որը խրթին է։ Եղեռնի վերաբերյալ է, բայց` առանց լացուկոծի։ Շատերը միգուցե քննադատեն և ասեն, թե Եղեռնին նվիրված միջոցառման մեջ ինչպե՞ս կարող է հարսանիք, ծափ–ծիծաղ, հումոր լինել, բայց գաղափարն այն է, որ մեր ուժը մեր միասնության մեջ է, և պետք է հիշել, մեծարել, պատվել, բայց առաջ գնալ։ Սա ոգեկոչ ներկայացում է՝ հայրենասիրական, դաստիարակչական ոգով։ Այն սնում է, պնդում, կարծրացնում ոգիները,–ասել  է նա:

Դրամատիկական թատրոնի դերասան, ներկայացման  գլխավոր դերակատար Գուրգեն Անտոնյանն էլ ասել է, թե բավ է՝ լացենք։

–Հանկարծ եթե մեկը փորձում է լացել, մեր գլխավոր կերպարը` շինարար Մարգարը, սաստում է՝ լացը լաց է բերում։ Լացի հետևում պախկվելով՝ շատ հեշտ է խուսափել գործ անելուց։ Ծնել, պահել–մեծացնելն ավելի դժվար է, քան լացելը,–ասել է նա:

Նրա խոսքերով՝ այսօրվա ամենաանհրաժեշտ կերպարներից է Մարգար պապը, ով երբեմն–երբեմն կոչ է անում, պահանջում երեխաներ ունենալ, ապրել ու արարել, անցյալը ողբալը թողնել:

–Մենք այսօր կարիք ունենք պերսոնաժների։ Ղարիբ լինելը մեզ պարտադրված է, և մենք սա արդարացնում ենք` հայի բախտ ասելով: Բայց մենք կարող ենք դա չընդունել, ըմբոստանալ դրա դեմ և ապրել արարումով,–ընդգծել է Գուրգեն Անտոնյանը:

Ներկայացումը տևում է մոտ 90 րոպե, սակայն բեմադրող ռեժիսորը վտահեցնում է, որ ոչ ոք չի ձանձրանա։

Տոմսերը չեն վաճառվում, և ստեղծագործական խումբը ձգտելու է այն միշտ ներկայացնել անվճար։ Բեմադրության համար անհրաժեշտ ողջ ֆինանսական ներդրումն արել է ստեղծագործական խումբն իր հաշվին։

–Եթե մի քիչ խելամիտ գտնվեն մարդիկ, կօգնեն այս գործին։ Այս ներկայացումը պիտի լինի դպրոցից մինչև 150 տարեկան մարդկանց համար, թող բարձր չհնչի, սեղանի գիրք,–ասել է Արատաշես Ալեքսանյանը։

Պատասխանելով «7օր»–ի հարցին, թե իսկ այդ կապակցությամբ Մշակույթի նախարարություն դիմե՞լ են՝ նա ասել է, թե՝ այո՛, դիմել են, բայց ստացել են մերժում՝ առանց պատճառաբանության։

7or.am