Ինչպես հաղորդում է «Ասոշիեյթեդ պրես» գործակակալությունը, ԱՄՆ պետքարտուղար  Հիլարի Քլինթոնը պատմել է, որ «Ալ Քաիդայի» առաջնորդ Ուսամա բեն Լադենին վերացնելու մասին հաղորդագրությանը սպասելիս ինքը  հազի նոպա է ունեցել և իրեն հազիվ է զսպել, որ  չփռշտա։

Հռոմում Իտալիայի արտգործնախարար Ֆրանկո Ֆրատինիի հետ  համատեղ ասուլիսում Քլինթոնը պատմել է այն իրադրության մասին, որը պատկերված է «Ալ Քաիդայի» առաջնորդ բեն Լադենին վերացնելու ժամանակ արված՝ ԱՄՆ–ի ղեկավարության բոլորին հայտնի լուսանակարում։ Այդ լուսանկարում Քլինթոնը  նստած է ձեռքով բերանը փակած։

Պետքարտուղարը պատմել է, թե բեն Լադենի տան վրա ԱՄՆ–ի հատուկ ծառայությունների  հարձակումն իր համար «38 ամենածանր րոպեներն են եղել», և ինքը չգիտի, թե Սպիտակ տան լուսանկարիչը ո՞ր պահին է արել հայտնի լուսանկարը։

Միևնույն ժամանակ Քլինթոնն իր  ձեռքի շարժումն ու դեմքի  արտահայտությունը հեռավոր  Պակիստանում իրականցվող գործողություններով  չի բացատրում։ Բանն այն է, որ ԱՄՆ պետքարտուղարը տառապում է գարնանն ի հայտ եկող ալերգիկ հիվանդությամբ, և բերանը ձեռքով փակել  է, որպեսզի ԱՄՆ–ի և մարդկության ճակատագրի համար այդքան կարևոր պահին չհազա կամ չփռշտա։