Մամլո ասուլիսի ժամանակ ՀՀՇ վարչության նախագահ Արամ Մանուկյանը հայտարարել է, որ մայիսի 20–ին Գերմանիայի Դրեզդեն քաղաքում՝ Եվրոպական լիբերալ-դեմոկրատների և բարեփոխումների կուսակցության (ԵԼԴԲԿ) խորհրդի նիստում, որին մասնակցել է նաև ՀՀՇ–ն, ընդունվել է հինգ հրատապ բանաձև, որոնցից մեկը Հայաստանի քաղբանտարկյալների վերաբերյալ է։

Ըստ նրա՝ Եվրոպայի լիբերալները Հայաստանի իշխանություններից պահանջել են անհապաղ և անվերապահ ազատ արձակել բոլոր քաղաքական բանտարկյալներին։

–Խորհրդի նիստը հանձնարարեց քարտուղարությանը հաջորդ նիստի ժամանակ հաշվետվություն ներկայացնել նշված բանաձևի կատարողականության վերաբերյալ,- հայտնել է Արամ Մանուկյանը։

Նրա պնդմամբ՝ սա վերաբերմունքի նոր դրսևորում է Հայաստանի նկատմամբ, որը ՀԱԿ-ի գործունեության արձագանքն է։

ՀՀՇ վարչության նախագահը հայտնեց, որ ալյանսը համապատասխան հաշվետվությունը կներկայացնի հոկտեմբեր–նոյեմբեր ամիսներին Միլանում՝ ԵԼԴԲԿ համագումարում:

–Այս փաստաթղթի նորությունն այն է, որ առաջին անգամ կոչ է արվել Եվրոպական խորհրդարանում լիբերալների և դեմոկրատների ալյանսին (ALDE) Եվրամիությունում բարձրացնել մուտքի արտոնագրի արգելման հարցն այն հայկական պաշտոնյաների համար, որոնք ներգրավված են եղել քաղաքական շարժառիթներով իրականացվող արդարադատության համակարգի չարաշահմանը,–ընդգծել է նա։

7or.am