«ՌԻԱ նովոստի»–ն գրում է, որ ֆրանսիական Դովիլ քաղաքում «Մեծ ութնյակի» գագաթաժողովում երկրների առաջնորդների կողմից ընդունված համատեղ հայտարարության մեջ ասվում է, որ Լիբիայի առաջնորդ Մուամար Քադաֆին ապագա չունի ժողովրդավարական Լիբիայում, և պետք է հեռանա։

«Քադաֆին և լիբիական կառավարությունը չեն կարողացել իրականացնել խաղաղ բնակչության պաշտպանության վերաբերյալ իրենց ստանձնած պարտավորությունները և կորցրել են իրենց օրինականությունը։ Քադաֆին այլևս ապագա չունի ժողովրդավարական Լիբիայում, նա պետք է հեռանա»,–ասվում է հայտարարության մեջ։

Ֆրանսիայի նախագահ Նիկոլյա Սարկոզին լրագրողներին ասել է. «Մենք չենք ասում, որ Քադաֆին պետք է աքսորվի։ Նա պետք է վայր դնի իշխանությունը, և ինչքան ավելի արագ, այնքան ավելի մեծ կլինի նրա ընտրությունը»։