Քաղաքական

19.07.2021 16:21


Առուշ Առուշանյանի դեմ ցուցմունք տված անձի փեսային օրերս պաշտոն են տվել

Առուշ Առուշանյանի դեմ ցուցմունք տված անձի փեսային օրերս պաշտոն են տվել

Օրեր առաջ լուրեր տարածվեցին, որ Քարահունջի վարչական ղեկավար Լուսինե Ավետյանը Գորիսի համայնքապետի դեմ ցուցմունք է տվել, ապա այդ լուրերը սկսեցին հերքել։ Եւ քանի որ Ավետյանը փաստաբան չուներ, դժվար էր դրանք ճշտելը։ Այսօր մենք նոր տեղեկություններ ենք ստացել, որոնք լույս են սփռում կատարվածի վրա։

Պարզվում է, Լուսինե Ավետյանի փեսան` Դավիթ Ներսիսյանը ուժային կառույցում է աշխատում եւ ըստ հավաստի լուրերի՝ հենց նրա միջոցով են կարողացել համոզել Ավետյանին ցուցմունք տալ։ Մենք չգիտենք՝ ինչ բովանդակության ցուցմունք է տվել Ավետյանը, սակայն փաստ է, որ այդ ցուցմունքից հետո Առուշ Առուշանյանին կալանավորեցին, իսկ նրա փեսան, որպես «պարգեւատրում», դրանից մի քանի օր առաջ պաշտոն է ստացել դատախազությունում։

Գլխավոր դատախազությունից Դավիթ Ներսիսյանի նշանակվելու վերաբերյալ տեղեկությունը հաստատեցին․ «Նշանակվել է Երևան քաղաքի Մալաթիա-Սեբաստիա վարչական շրջանի դատախազությունում՝ հուլիսի 2-ին»։

Ներսիսյանը նախկինում աշխատել է ԱԱԾ-ում, սովորական ծառայող է եղել: Նշենք նաեւ, որ օրեր առաջ Առուշանյանի փաստաբաններից Արմեն Մելքոնյանը լրագրողների հետ զրույցում, անդրադառնալով իր պաշտպանյալի դեմ տրված ցուցմունքին, նշել էր․ «Կալանավորված, տարեց կին է եղել, Քարահունջի ղեկավարի մասին է խոսքը։ Նա սկզբից հերքել է, որ Առուշանյանը որեւէ բան է ասել, օրեր անց հարցաքննել են, մի ցուցմունքով ասել է՝ այո, Առուշանյանն ասել է, որ «Հայաստան» դաշինքի օգտին քվեարկեն»։

Դրանից հետո ՀՔԾ-ն հաղորդագրություն տարածեց, որ Սյունիքի մարզի Գորիս համայնքի ղեկավար, «Հայաստան» դաշինքի ընտրական ցուցակի 32-րդ համարը զբաղեցնող Ա.Ա.-ն, հիշյալ դաշինքի օգտին առավելագույն քվեներ ապահովելու եւ ընտրություններում ցանկալի արդյունք արձանագրելու անձնական եւ խմբային շահերից ելնելով` նախապատրաստել է ծանր հանցագործություն, այն է` երկու եւ ավելի ընտրողի կաշառք տալը:

Աղբյուրը՝ hraparak.am

Այս խորագրի վերջին նյութերը