Նման օրենք, կարգավորում չկա ՀՀ որևէ օրենսգրքով: Այս մասին լրագրողների հետ զրույցում ասաց ԱԺ «Հայաստան» խմբակցության պատգամավոր Քրիստինե Վարդանյանը, որը նշեց, թե կառավարության մոտ է եկել այն պատճառով, որ Ոստիկանությունն զգուշացրել է՝ ակցիայի մասնակիցների՝ բարձրախոսով ելույթ ունենալու դեպքում բերման է ենթարկելու:

Հիշեցնենք՝ Կառավարության մոտ փորձում էին բողոքի ակցիա իրականացնել ՀՅԴ «Նիկոլ Աղբալյան» ուսանողական միության անդամները:

«Մի քանի մարդու արդեն բերման են ենթարկել, մեկին «ռուպրով» խոսելու համար, մեկին՝ պարզապես հարցազրույց տալու համար: Եթե ՀՀ-ում մարդկանց բերման են ենթարկում «ռուպրով» խոսելու համար, Ոստիկանությունը պետք է համարի, որ ես հիմա «ռուպրով» եմ խոսում: Ես հենց հիմա կրկնեցի այն ամենը, որ ասացին իմ ընկերները, ինչպես են որոշում՝ ում բերման ենթարկել»,-ասաց նա՝ հարցնելով՝ այդ դեպքում ինչո՞ւ իրեն բերման չեն ենթարկում:

«Դուք ո՞նց եք որոշում՝ ում բերման ենթարկել, զանգում, ասո՞ւմ են՝ տարեք այս մարդուն, այս մեկին թողեք: Այսպիսի աբսուրդ տեսե՞լ եք, որ նախկինում «ռուպրով» խոսելու համար մարդկանց բերման ենթարկեին»,-ասաց պատգամավորը՝ դիմելով ոստիկաններին:

Աղբյուրը՝ tert.am