Մեկնաբանություն

25.10.2021 11:43


Կորոնավարակի ավերածությունները՝ նիկոլավարակի հետևանք

Կորոնավարակի ավերածությունները՝ նիկոլավարակի հետևանք

Հայաստանի շուրջ անվտանգային հարցերով այնպիսի զարգացումներ են տեղի ունենում, որ ստվերում են մեկ այլ խնդիր՝ կորոնավարակով պայմանավորված խնդիրը։ Մինչդեռ կորոնավարակը ոչ կապաս անվտանգային խնդրի է վերածվել, քանզի գործ ունենք մարդկային կյանքերի հետ։

Կորոնավարակի դեմ պայքարն իշխանությունները տապալել էին «էն գլխից»։ Տապալել էին այնպես, ինչպես տապալել են Արցախի հարցով բանակցությունները, հետո՝ պատերազմը, իսկ այժմ՝ հետպատերազմական գործընթացները։

Նիկոլ Փաշինյանը կորոնավարակի դեմ պայքարը սկզբում տապալեց՝ Սահմանադրական դատարանը գրավելու նպատակով։ Հետո տապալեց իր կառավարության ու հատկապես Առողջապահության տխրահռչակ նախարար Արսեն Թորոսյանի դիլետանտիզմի, ապաշնորհության պատճառով։

Հիմա կորոնավարակի դեմ պայքարը տապալվում է իշխանության նկատմամբ անվստահության պատճառով։ Թվում է, թե իշխանությունը վեց հարյուր հազարից ավելի քվեներ է ստացել և չունի հանրային վստահության պակաս, բայց իրականությունն այլ է։

Իշխանությունը չի կարողանում համոզել մարդկանց, որ պետք է պատվաստվել։ Չի կարողանում, քանզի անհեթեթ որոշում է կայացրել, որ պաշտոնյաները, որոշակի կարգավիճակ ունեցողները կարող են չպատվաստվել, ինչը մարդկանց մոտ տեսակետ է ձևավորել, ըստ որի՝ պատվաստումը վատ բան է, որովհետև եթե լավ բան լիներ, ապա իշխանավորներն իրենք իրենց չէին ազատի պատվաստվելու անհրաժետությունից։

Իշխանությունը չի կարողանում պատվաստումների գործն առաջ տանել, քանզի ամբողջությամբ տապալել է քարոզչությունը։

Ստացվում է պարադոքսալ իրավիճակ։ Նիկոլին քվե տվածները չեն լսում նրա՝ անպայման պատվաստվելու կոչերը։ Սա քաղաքական առումով բերում է այն եզրահանգման, որ ա) ԱԺ վերջին ընտրություններում քվեների կեղծման մասին կարծիքները հիմնավոր էին, բ) մարդիկ քվեարկել են ոչ թե Նիկոլի օգտին, այլ նախկինների դեմ, գ) եթե անգամ մարդիկ քվե են տվել Նիկոլին, ապա հիմա փոշմանել են ու նիկոլական իշխանության ամեն մի ասածի հակառակն են անում ու տվյալ դեպքում չեն գնում պատվաստման։

Պատվաստումներին այլընտրանք չկա։ Այլ բան գիտությունը դեռ չի հայտնաբերել։ Հայաստանը պատվաստումների տոկոսով ամենացածրերից է աշխարհում։ Առողջապահության գործող նախարարն իր նախորդից ոչ պակաս վատ կառավարիչ է։ Արդյունքում՝ հիվանդանոցներում տեղ չկա, մարդիկ մահանում են։ Կորոնավարակի տարածումը դարձել է նիկոլավարակի հետևանք, ու վերջը չի երևում։

Պետրոս Ալեքսանյան

Այս խորագրի վերջին նյութերը