Այսօր Հանրապետության հրապարակում բազմաթիվ վարորդներ բողոքի ակցիա էին իրականացնում ընդդեմ ԱՊՊԱ-ի թանկացումների՝ «ԱՊՊԱ-ն չի՛ թանկանալու» կարգախոսով և մեքենաների վրա այլ գրություններով։

Հայաստանի ավտոապահովագրողների բյուրոն որոշում է կայացրել վերանայել ԱՊՊԱ-ի արժեքը, ինչի հետևանքով բարձրացվելու են բազային սակագները, նաև փոփոխություններ տեղի կունենան ապահովագրության արժեքի հաշվարկման համակարգում:

Բյուրոյի տարածած հայտարարության մեջ ասվում է, որ փոփոխությունները պայմանավորված են մի շարք հանգամանքներով՝ վթարների թվի աճ և փոխհատուցման ծավալների ավելացում, առավելագույն փոխհատուցման գումարի ավելացում, ծառայությունների որակի բարձրացման ձգտում: Որոշման վրա ազդել է նաև ավտոմեքենաների վերանորոգման գնի ավելացումը, պահեստամասերի թանկացումը և այլն։

«Եթե վթարը լինում է իմ մեղքով և հարվածում եմ շատ թանկարժեք մեքենայի, վճարը 300 տոկոսով բարձրանում է: Սա է մեր դժգոհությունը: Ես ո՛չ որևէ մեկից ակնկալիք ունեմ, ո՛չ հանդիպում եմ պահանջում, ուղղակի ես իմ անհամաձայնությունն եմ արտահայտում»,-ասաց ակցիա իրականացնող վարորդներից մեկը։

Բերման ենթարկելու ընթացքում մարմնական վնասվածք ստացած մի վարորդ աղաղակում էր․ «Քթիցս արյուն ա գալիս, կանգնի՛։ Մեքենայիս մեջ 2 հազար դոլար գումար կա, հենց նոր չթողեցին մեքենայիս դռները փակեմ»։

Ոստիկանության լրատվական ծառայությունից Yerkir.am-ին տեղեկացրին, որ ԱՊՊԱ-ի վճարների թանկացման դեմ բողոքի ակցիա իրականացնող վարորդներից 5-ին ոստիկանները բերման են ենթարկել, 3 մեքենա էլ տեղափոխվել է տուգանային հրապարակ։

Արձանագրություն է կազմվել վարչական իրավախախտումների վերաբերյալ օրենսգրքի 182–րդ հոդվածով (ոստիկանության զորքերի զինծառայողների կամ ոստիկանության ծառայողի օրինական պահանջը չկատարելը) նախատեսված արարքի համար։