«Քաղաքացիական պայմանագիրը» բոյկոտեց մեր նախաձեռնած ԱԺ արտահերթ նիստը և Արցախի շուրջ ստեղծված իրավիճակի հետ կապված ներկայացրեց հայտարարության տեքստի իր տարբերակը։ ՔՊ–ական հայտարարությունը մեզ համար անընդունելի էր, և մենք չմասնակցեցինք քննարկմանը։

Մեր և «Քաղաքացիական պայմանագրի» հայտարարության տեքստերում գաղափարափիլիսոփայական էական տարբերությունն այն է, որ նիկոլենք Ղարաբաղը համարում են Ադրբեջանի մաս, իսկ մենք՝ ոչ։ Մնացածը դետալներ են։

Ղարաբաղն Ադրբեջանի մաս համարելն է պատճառը, որ ՔՊ–ն դեմ է արտահայտվում մեր առաջարկներին, մասնավորապես այն կետին, ըստ որի՝ Հայաստանն ունի հանձնառություն Արցախի Հանրապետության անվտանգության և իրավունքների, այդ թվում՝ ինքնորոշման իրավունքի իրացման ապահովման հարցերում (ՔՊ–ն մերժում է այս մոտեցումը և խրտնում «հանրապետություն» բառից)։