Այսօր Ազատության հրապարակում տված ասուլիսում Լևոն Տեր–Պետրոսյանն անդրադառնալով Արարատ Զուրաբյանի, Ժիրայր Սեֆիլյանի, Տիգրան Խզմալյանի, Կարապետ Ռուբինյանի և այլոց՝ հրապարակում չլինելու մասին հարցին՝ հայտարարել էր, թե նրանք կարող են նեղանալ իրենից, Լևոն Զուրաբյանից, բայց այնտեղ ժողովուրդն է, իսկ ժողովրդից չե՛ն նեղանում։

Լևոն Տեր–Պետրոսյանի այս հայտարարությանն ի պատասխան՝ Տիգրան Խզմալյանը «7օր»–ին ասել է.

–Ֆրանսիայի թագավորներից մեկն ասում եր. «Պետությունը՝ ե՛ս եմ»: Եթե պարոն Տեր-Պետրոսյանն իսկապես ասել է, որ ինչ որ մեկը «ժողովրդից կամ առավել ևս իրենից է խռովել», ուրեմն նա ինքն իրեն նույնացնում է ողջ ժողովրդին: Ֆրանսիական արքաները նման դեպքերում առավել մեծահոգի էին գտնվում, նրանք գոնե որոշ այլախոհություն էին թույլատրում սեփական հպատակներին, օրինակ կաթոլիկներին ու բողոքականներին: Ես, բնավ, ոչ ոգից, առավել ևս ժողովրդից, խռոված չեմ։ Ես միայն ափսոսում եմ, որ բռնատիրության դեմ իրական պայքարի փոխարեն առաջին նախագահը պայքարում է սեփական կարծիք ունեցող մարդկանց դեմ ու միաժամանակ շարունակում է «երկխոսությունը» հանցավոր ռեժիմը ներկայացնող սեփական նախկին աշխատակիցների հետ, մինչդեռ դիմադրության շարժումն արժանանում է իր կողմից հերթական «Չեմբերլենյան պատասխանի»: Ինչպես հայտնի է պատմությունից, ինքնահավան Լյուդավիկոսները Ֆրանսիայում քսանի էլ չհասան ու հեղափոխության փոթորիկը փոխարինեց միապետությունը հանրապետություններով, որից հինգերորդի նախագահը շուտով ժամանելու է Հայաստան։

7or.am