Մեկնաբանություն

23.03.2023 17:00


Նիկոլ Փաշինյանն ու էնցիֆալիտային տիզը

Նիկոլ Փաշինյանն ու էնցիֆալիտային տիզը

Կառավարության նիստում Նիկոլ Փաշինյանը մի երկար, սրտաճմլիկ ելույթ ունեցավ առ այն, թե՝ փիս Ալիևը բոլոր պայմանավորվածությունները խախտում է, ագրեսիվ հայտարարույթուններ ու գործողություններ է անում, այս-այն: Եթե իրերն իրենց անուններով կոչենք, ապա Նիկոլ Փաշինյանի խոսքը ելույթ էլ չէր, այլ պերմանենտ լուզերի պաթոլոգիկ նվնվոց: Ու Նիկոլ Փաշինյանի այսօրվա ելույթն այնպիսին էր, որ գրեթե ամեն պարբերությունից հետո ակամայից ցանկություն էր առաջանում հեգնել՝ «իյա՜, իրո՞ք...»:

Մեծ հաշվով, Նիկոլ Փաշինյանը այդ նվնվոց-ելույթով ևս մեկ անգամ փաստեց իր իսկ հռչակած «խաղաղության օրակարգի«, այսինքն՝ իր հիմնական քաղաքական «ուղեգծի» բացարձակ տապալումն ու սնանկությունը: Բայց այդքանից հետո նա էլի ասում է. «Ուզում եմ հետևյալ ուղերձը հղել բոլորիդ և միջազգային հանրությանը. խաղաղության պայմանագիր լինելու է և լինելու է մինչ օրս բարձրագույն մակարդակներում ձեռք բերված գրավոր փաստաթղթերի հիման վրա»: Փաշինյանը կա՛մ չի հասկանում իրավիճակն ու իրողությունները, կա՛մ անհասկացող է ձևանում:

Առաջինն, ինչը «չի հասկանում» Նիկոլ Փաշինյանը այն է, որ իր ստորագրած, իսկ հիմա էլ վկայակոչվող «գրավոր փաստաթղթերը» ոչ այլ ինչ են, եթե ոչ՝ հենց «թղթե շերեփ»: Առհասարակ, Նիկոլ Փաշինյանի որդեգրած արտաքին-քաղաքական գիծն ու գործելակերպը «թղթե շերեփի» քաղաքականություն է: Իսկ «թղթե շերեփ» է, քանի որ այդ ամենի ետևում Հայաստանի կողմից չկա ուժ, որը Նիկոլ Փաշինյանը թուլացրել է, որքան կարող է: «Թղթե շերեփ» է, քանի որ այդ ամենի ետևում չկա ազգային ու հանրային միասնություն, որը Նիկոլ Փաշինյանը փսորել ու փսորում է, որքան կարող է: «Թղթե շերեփ» է, քանի որ այդ ամենի ետևում արդեն չկա հարգանքի արժանի պետականություն, իսկ շուտով չի լինելու նաև իշխքնիշխանություն, որոնք Նիկոլ Փաշինյանը արդեն 4-5 տարի է, ինչ հետևողականորեն քանդում է, ավերում, տանում զրոյացման:

Երկրորդն, ինչ «չի հասկանում» Նիկոլ Փաշինյանը, այն է, որ թշնամու հետ վերելակներում սիլի-բիլի անելով, տակուգլուխ, եթե չասվի՝ ափռ-ցփռ հայտարարություններ անելով, այդ հենց ի՛նքն է ստեղծել այնպիսի իրավիճակ և իրադրություն, որի պայմաններում հնարավոր դարձան ադրբեջանաթուրքական ագրեսիան, 2020–ի նոյեմբերի 9–ին արձանագրված մեր պարտությունը, 2022-ի հոկտեմբերի 6-ի Պրահայի «գրավոր փաստաթուղթը»: Այսինքն, նման իրավիճակի «գլխավոր ճարտարապետը», հիմնական մեղավորը ի՛նքն է, ոչ թե ուրիշ մեկը:

Ու այսօր Նիկոլ Փաշինյանը ելել, ցուցադրաբար լացուկոծ է անում, թե՝ տեսե՜ք, Ալիևը խախտում է նոյեմբերի 9-ի հայտարարության այսինչ կամ այնինչ կետը: Ի դեպ, Պրահայում Փաշինյանի ընդունածը խմբագրել է նոյեմբերի 9–ի փաստաթուղթը, որը, մեղմ ասած, մեր երազանքներինը չէր, բայց գոնե Լեռնային Ղարաբաղի ու Լաչինի հարցն արծարծվում էր: Պրահայում Լեռնային Ղարաբաղն ու Լաչինը մի կողմ են նետվել և դրվել Ալիևի պահանջների տակ։

Երրորդն, ինչը «չի հասկանում» Նիկոլ Փաշինյանը, այն է, որ հենց ինքն է ընդունել Արցախն Ադրբեջանի կազմում, ինքն է Ալիևի բերանը լեզու դրել։ Իսկ ո՞ւմ հասկանալի չէր, որ այդքանից հետո Ալիևի ագրեսիայի ու զավթողական ախորժակը էլ ավելի էր բացվելու: Նա էլ հո հիմա՞ր չէ, տեսնում է, թե դիմացը ինչ կարգի թույլիկ է, որը միայն «թղթե շերեփ» է ճոճում, բնականաբար, ձգտելու է և ձգտում է կրծել, պոկել, տանել այնքան, որքան կարող է ու ավելացնում է պահանջները: Չէ՞ որ դիմացինը իր առջև կզած, իր կողմից նվաստացված մեկն է:

Ի վերջո, առաջին հերթին հենց Նիկոլ Փաշինյանը, նրա ընդունած որոշումները, նրա կատարած քայլերն են բերել նման վիճակի: Կապ չունի՝ նա այդ ամենը արել է դիտմա՞մբ, թե՞ անուղղելի անձեռնահասությունից ելնելով ու չհասկանալով: Դրանից վիճակն ու նրա արածների ծանրագույն հետևանքները չեն վերանում:

Չորրորդն, ինչը չի հասկանում Նիկոլ Փաշինյանը, այն է, որ ինքն այլևս անելիք չունի: Այն է, որ ինքն այլևս բացարձակապես սպառված երևույթ է, իսկ իր գոյությունը՝ որպես ՀՀ իշխանություն, նշանակում է չարիքի շարունակություն, նշանակում է Հայաստանի չգոյություն:

Այնպես որ, եթե Հայաստանում ժողովուրդը սրտանց ցանկանում է կոտորվել ու ոչնչանալ, թող որքան կարող է, ամուր բռնի Նիկոլ Փաշինյանի «պոչը», իսկ եթե այնուամենայնիվ մեր ժողովուրդը ցանկանում է շարունակել հազարամյակներից եկող ընթացքը սեփական հայրենիքում ու պետության մեջ, ապա պետք է Նիկոլ Փաշինյանին հեռացնի իշխանությունից, որին նա կառչել է թունավոր, էնցիֆալիտային տզի նման:

Արմեն Հակոբյան

Այս խորագրի վերջին նյութերը