Օգոստոսի լույս 18-ի գիշերը, ժամը 04:24-ին, ադրբեջանական կողմից, դեռևս չպարզաբանված ավտոմեքենայով Հայաստան-Ադրբեջան սահմանագծի ՀՀ Սյունիքի մարզի Կապանի «Սյունիք» օդանավակայանի հարակից տարածք եկած անհայտ անձը Ադրբեջանի տարածքից երեք կրակոց է արձակել Կապանի «Սյունիք» օդանավակայանի ուղղությամբ և հեռացել: Փամփուշտներից երկուսը վնասել են օդանավակայանի պատուհաններից մեկը և տանիքը:

Այս մասին տեղեկացանք ԱԱԾ տարածած հաղորդագրությունից:

Այդ ժամին Նիկոլ Փաշինյանն արդեն «Սյունիք» օդանավակայանում չէր և ինչպես հասկանալի է հաղորդագրությունից, չի տուժել:

ԱԱԾ-ի այդ հաղորդագրությունը միգուցե նման ուշադրություն չգրավեր, եթե օգոստոսի 17-ին, ինքնագովազդման բացահայտ նպատակներով Նիկոլ Փաշինյանը Երևանից ինքնաթիռով մեկնած չլիներ Կապան, ինչպես տարածած պաշտոնական հաղորդագրության մեջ է նշվում՝ «փորձարկելով նոր ավիաուղին»: Հաղորդվում էր նաև, որ Փաշինյանը ծանոթացել է «Սյունիք» օդանավակայանի պայմաններին»: Այդ պահի դրությամբ «Սյունիք» օդանավակայանի վրա դեռ ադրբեջանական կողմից արձակված կրակոցներից մնացած անցքերը չկային:

Դրանից հետո Փաշինյանը հայտարարել է, թե պատրաստ են Երևան-Կապան կանոնավոր չվերթների իրականացմանը:

Ավելին, հայտարարել է, թե օգոստոսի 19-ին՝ Կապանի օրվա առթիվ, կլինի ներկայացուցչական չվերթ, որից հետո արդեն հաջորդ շաբաթ կսկվեն կանոնավոր չվերթերը:

Այս ամենը բացարձակ փիառ է: Նախ, ի՞նչ «նոր ավիաուղու» մասին է խոսքը, եթե Կապանի հետ օդային կապի հնարավորություն միշտ էլ եղել է, օդանավակայանն էլ դեռ «նախկինների» օրոք է վերականգնվել, տո թռիչքներ էլ են եղել:

Երկրորդ. Նիկոլ Փաշինյանի քաղաքականությունը հանգեցրել է այն բանին, որ Կապանի հետ ցամաքային, ավտոմոբիլային կապի հնարավորույթունն էապես վատացել է, բուն հայկական հողերի վրա գտնվող ու Կապան տանող նորմալ ավտոճանապարհի մի զգալի հատվածը Նիկոլ Փաշինյանը հանձնել է: Հիմա էլ բանն այնտեղ է հասել, որ երևի միայն օդանավով կարելի է Կապան հասնել:

Բայց դա էլ ամենը չէ. Կապանի օդանավակայանը գտնվում է ադրբեջանական ուժերի ուղիղ նշանառության ու կրակային (հրաձգային զինատեսակներից) անմիջական հասանելիության տակ: Պարզ ասած՝ թշնամին ցանկացած պահի կարող է կրակ բացել թե՛ օդանավերի, թե՛ ուղևորների, թե՛ օդանավակայանի վրա:

Այսինքն, Նիկոլ Փաշինյանն այնպես է արել, որ Կապան միայն օդանավով հնարավոր լինի գնալ, այն էլ՝ թշնամական կրակոցների տարափի տակ: Ու ամենից ցինիկն այն է, որ դա նա իր կողմնակիցների վրա «ծախում» է որպես մի երևելի ձեռքբերում:

Տեսնես այդ ինչի՞ց է, որ թշնամին, տեսնելով, որ Նիկոլ Փաշինյանն է օդանավից ելնում՝ կրակ չեն բացել: Չնայած, ի՞նչ կա գուշակելու, երևի նրանք յուրայինների վրա չեն կրակո՞ւմ:

Արթուր Խայթ