Լիբիայի նախկին առաջնորդ Մուամար Քադաֆիի արյունոտ մարմինը Միսրաթ քաղաքում հրապարակային ցուցադրման է հանվել առևտրի կենտրոնի սառնարանում։ Այս մասին հաղորդում է «Ասոշիեյթեդ պրես» գործակալությունը։

Ինչպես հայտնում է «ՌԻԱ նովոստի»–ն, Միսրաթի բնակիչները երկարությամբ հերթ են կանգնել առևտրի կենտրոնի առջև, որտեղ բանջարեղենի համար նախատեսված սառնարաններից մեկում պահվում է Քադաֆիի դին։

Մարմինը հսկելու համար կանգնեցված մարդիկ չեն կարողացել դիմանալ բնակիչների ճնշմանը և ստիպված են եղել Քադաֆիի դին տեսնելու համար ժամեր սահմանել։

Հերթում կանգնածները գոռում են «Մենք ուզում ենք տեսնել այդ շանը», իսկ այցելուները մեծ բավարարվածությամբ լուսանկարվում են Քադաֆիի մարմնի մոտ։