ԱՄՆ պետքարտուղար Էնթոնի Բլինկենին Անկարայի օդանավակայանում դիմավորել են մթության մեջ։ Բացի այդ, նրան դիմավորողների թվում բարձրաստիճան պաշտոնյաներ չեն եղել: Այս մասին գրում են թուրքական լրատվամիջոցները։

Անկարայում Բլինկենին ոչ գրկաբաց ընդունելը բուռն քննարկման թեմա է դարձել սոցցանցերի թուրքական տիրույթում, մի շարք օգտատերեր կարծում են, որ ամերիկացի քաղաքական գործիչը ստացել է այն, ինչին արժանի է։ Բլինկենը Թուրքիայի մայրաքաղաք է հասել գիշերը։

«Թուրք բարձրաստիճան պաշտոնյաներից ոչ մեկը ամերիկացի պաշտոնյային չի դիմավորել օդանավակայանում։ Հատկանշական է նաև, որ տարածքը չի լուսավորվել։ Ողջունելով մթության մեջ իրեն սպասող մարդկանց` Բլինկենը նստել է իր մեքենան»,-գրում է «Turkiye» թերթը։

Թուրքիայի նախագահ Ռեջեփ Թայիփ Էրդողանն ավելի վաղ քննադատել էր Բլինկենին պաղեստինա-իսրայելական սրացման նկատմամբ նրա սուբյեկտիվ մոտեցման համար: Թուրքիայի ղեկավարի խոսքով` ԱՄՆ պետքարտուղարը ճգնաժամին մոտենում է իր ազգային պատկանելությունից ելնելով։

Այսօր Թուրքիայի արտգործնախարար Հաքան Ֆիդանը և Բլինկենը Գազայում տիրող իրավիճակի շուրջ բանակցություններ կանցկացնեն:

Աղբյուրը՝ armeniasputnik.am