Բրազիլիայում 21-ամյա ուսանողը չորս օր ապրել է գլխում փամփուշտով. այս մասին հայտնում է G1-ը։

Միջադեպը տեղի է ունեցել դեկտեմբերի 31-ին, երբ Մատեուշ Ֆասիոն Ռիո դե Ժանեյրոյի լողափում ընկերների հետ տոնում էր Ամանորը։ Ուսանողի խոսքով`ինքը կրակոցի ձայնը չի լսել և մտածել է, որ ինչ-որ մեկը քարով հարվածել է իր գլխին: Հետո երիտասարդը նկատել է, որ գլխից արյուն է հոսում:

«Ես պայթյունի պես ձայն լսեցի, բայց գլխիս ներսում... հետո ցավ զգացի»-վերհիշել է նա՝ հավելելով, որ դրանից հետո շարունակել է զվարճանալ։

Հետագա չորս օրվա ընթացքում բրազիլացին գաղափար անգամ չի ունեցել, որ ինքը լուրջ վնասվածքներ է ստացել։

Միայն հունվարի 4-ին աջ ձեռքի մկաններում սպազմեր նկատելով՝ նա դիմել հիվանդանոց։. Հետազոտությունից հետո բժիշկները պարզել են, որ նրա գլխում փամփուշտ կա։

Ֆասիոն օտար առարկայի հեռացման վիրահատության է ենթարկվել, որից հետո երկու օր անցկացրել է վերակենդանացման բաժանմունքում, ևս մեկ օր՝ հիվանդանոցում բժիշկների հսկողության տակ։

Չնայած բժիշկների մտահոգություններին, վիրահատությունը հաջող է անցել, և հիվանդը չի ունեցել որևէ բարդություն, այդ թվում՝ արյունահոսություն կամ մենինգիտ:

«Անհավանական է չորս օր ապրել փամփուշտը գլխիդ մեջ և ոչինչ չզգալ։ Սա նրա երկրորդ ծնունդն է։ Մատեուշը կարող է երկու անգամ նշել ծննդյան օրը»,-ասել են բժիշկները։

Աղբյուրը՝ tert.am