05.11.11թ.  Կառավարության  համացանցային  կայքը, շարունակելով  ՀՀԿ–ական   քարոզչություն  իրականացնել,  տեղեկացրեց, այն  էլ՝ «Պաշտոնական լրահոս» բաժնում  (Հ.Գ.),  որ Վարչապետի պաշտոն  զբաղեցնող ՀՀԿ–ականը  շարունակում  է  իր ծառայողական (պաշտոնեական) դիրքն օգտագործել հօգուտ կուսակցական շահերի («Կուսակցությունների մասին»  ՀՀ  օրենքի        10-րդ  հոդված)... այս  անգամ՝  Երևանի Աջափնյակ վարչական շրջանում:

Ավելին` այդ  ՀՀԿ-ականը մի  նոր  խախտում  էլ  իրականացրեց, այն  է՝ կուսակցական    գործունեությունը  ծավալեց  նաև  դպրոցում (նույն  օրենքի  5-րդ հոդված):

Սա  ի՞նչ  է՝ ատելություն  սեփական երկրի  օրենսդրության հանդե՞պ, ամենաթողությո՞ւն թե՞  օրենսդրության չիմացություն:

Ի դեպ, այս  անգամ խախտումներին  միացավ  նաև  մեկ  այլ  ՀՀԿ–ական՝ Երևանի քաղաքապետի  առաջին  տեղակալը:

Իրենց  հերթին, գրեթե բոլոր  հեռուստաընկերությունները՝ խախտելով օրենսդրության պահանջները, տեղեկատվություն  (կոչեր)  տարածեցին  այդ  ապօրինությունների  մասին:

Այդ  կապակցությամբ այսօր դիմել  ենք  ՀՀ  արդարադատության  նախարարություն, ՀՌԱՀ  և  Հատուկ քննչական  ծառայություն:

Միաժամանակ հարցում  եք  ուղարկել  Սանկտ- Պետերբուրգի ֆինանսների և տնտեսության պետական համալսարան՝ պարոն  Տ. Սարգսյանի  իրավագիտական  կրթության մասին, մասնավորապես՝ նրա  ուսումնական ծրագրում  եղե՞լ  է   արդյոք  որևէ առարկա  այդ  բնագավառից:

ՀՊԱԿ  լրատվություն

Հ.Գ. -  http://www.gov.am/am/news/item/9204/

Պաշտոնական լրահոս  -  Շաբաթ, 5 Նոյեմբեր 2011թ.

Տիգրան Սարգսյանն Աջափնյակում մասնակցել է նորաստեղծ այգու բացմանը և ծառատունկին

Վարչապետ Տիգրան Սարգսյանն այսօր այցելել է Երևանի Աջափնյակ վարչական շրջան: Կառավարության ղեկավարը նախ եղել է վարչական շրջանի Արամայիս Երզնկյանի անվան մաթեմատիկաբնագիտական ուղղվածությամբ թիվ 118 ավագ դպրոցում, ծանոթացել այստեղ իրականացված վերանորոգման աշխատանքներին և ուսումնական գործընթացին... Այնուհետև կառավարության ղեկավարը մասնակցել է Աջափնյակի 16-րդ թաղամասի 3-րդ շղթայի բարձրահարկ շենքերի միջնամասում հիմնված այգու և խաղահրապարակի բացմանն ու կազմակերպված ծառատունկին: Վարչապետ Տիգրան Սարգսյանը, ով նաև Հայաստանի Հանրապետական կուսակցության գործադիր մարմնի անդամ է, այցելել է թիվ 153 դպրոց, հանդիպել ՀՀԿ ներկայացուցիչներին, որից հետո շուրջ 200 աջափնյակցիների անձամբ է հանձնել կուսակցական անդամատոմսեր: Տիգրան Սարգսյանը շնորհակալություն է հայտնել կուսակցության նոր անդամներին` ՀՀԿ-ին միանալու համար, և համոզմունք է հայտնել, որ միասնաբար հնարավոր կլինի կառուցել այնպիսի երկիր, որով տարիներ անց կհպարտանան բոլորը: «Դուք մեզ հետ միասին եք կառուցելու մեր պետության պայծառ ապագան: Ձեր այս որոշումը կարևոր է հենց այսօր, երբ իշխանության առջև են ծառացել բազմաթիվ խնդիրներ և մարտահրավերներ: Շնորհակալ եմ ձեզ՝ խնդիրները համատեղ ջանքերով հաղթահարելու պատրաստակամության և հանրապետության նախագահի շուրջ համախմբվելու համար»-ասել է Տիգրան Սարգսյանը՝ ավելացնելով, որ ժողովուրդը միասնաբար պետք է կարողանա ստեղծել այն ամուր հիմքը, որն ապահովելու է մեր պետության հետագա զարգացումը: