Աշխարհի ամենատարեց բնակիչը նշել է 117-րդ տարեդարձը. խոսքն իսպանացի թոշակառու Մարիա Բրանյաս Մորերայի մասին է, գրում է Daily Mail-ը:

Մորերան ծնվել է Սան Ֆրանցիսկոյում 1907 թվականին, երբ քաղաքը տառապում էր բուբոնիկ ժանտախտի երկրորդ ալիքից: Այնուհետև նա վերապրել է երկու համաշխարհային պատերազմ, իսպանական գրիպի համավարակը, իսպանական քաղաքացիական պատերազմը և Covid-19-ի համավարակը:

Իսպանուհին աշխարհի ամենատարեց մարդու պաշտոնական կոչումը ստացել է 2023 թվականի հունվարին՝ ֆրանսիացի միանձնուհու մահից հետո:

Իր տարիքի համար անսովոր է, սակայն Մորերան X սոցցանցի ակտիվ օգտատեր է և իր 16,000 հետևորդներին պարբերաբար թարմացումներ է տալիս իր առօրյայի մասին:

Այսօր նա գրել է. «Բարի լույս աշխարհ։ Այսօր ես դառնում եմ 117 տարեկան։ Ես այսքան հեռու եմ գնացել»։



Այս տարիքում Մորերայի բացառիկ առողջությունը գրավել է գիտնականների ուշադրությունը՝ ուսումնասիրելու կնոջ օրգանիզմը:

Գիտնական Մանել Էսթելլերը իսպանական ABC լրատվականին ասել է. «Նա միանգամայն պարզ միտք ունի: Նա տպավորիչ հստակությամբ հիշում է իրադարձությունները, որոնք տեղի են ունեցել, երբ նա ընդամենը չորս տարեկան էր: Նա չունի սրտանոթային որևէ հիվանդություն, որը տարածված է տարեցների մոտ։ Ակնհայտ է, որ կա գենետիկ բաղադրիչ, քանի որ նրա ընտանիքի մի քանի անդամներ ևս 90 տարեկանից բարձր են»:

Մորերան համաձայնել է համագործակցել գիտնականների հետ և որոշ գիտական թեստեր անցնել. գիտնականները հույս ունեն ավելին իմանալ երկարակեցության գաղտնիքների մասին: Նրանք արդեն վերցրել են նրա թքի, արյան և մեզի նմուշները և կհամեմատեն կնոջ 80-ամյա դստերից վերցված նմուշների հետ։ Նմուշները թույլ կտան գիտնականներին ուսումնասիրել Մորերայի գեները և օգնել դեղամիջոցների մշակմանը, որոնք կարող են պայքարել տարիքային հիվանդությունների դեմ:

Մորերան ունի երեք երեխա, 11 թոռ և 13 ծոռ, իր երկարակեցությունը վերագրում է «կարգապահ լինելուն, հանգստությանը» և «թունավոր մարդկանցից հեռու մնալուն»:

Աղբյուրը՝ tert.am