Թեյլոր Սվիֆթը, իր փառավոր կարիերայից 17 տարի անց, պաշտոնապես հասել է միլիարդատիրոջ կարգավիճակի:

Forbes-ը հրապարակել է 2024 թ-ի միլիարդատերերի իր ցուցակը, որտեղ Թեյլորը բարձրացել է տասնչորսերորդ հորիզոնական։ Շնորհիվ նրա Eras շրջագայության, երաժշտական ​​կատալոգի արժեքի և անշարժ գույքի պորտֆելի՝ նրա կարողությունը գնահատվում է 1,1 միլիարդ դոլար:

Սա նաև երգչուհու առաջին վեց ալբոմների հսկայական եկամուտների արդյունքն է, որոնք նա վերաձայնագրել է հոսքային հարթակների հետ բանակցությունների ընթացքում: Այս ձեռքբերումը, հատկապես, առանցքային է, քանի որ նա այն քչերից է, ով հասել է այս կարևոր նվաճմանը «միայն երաժշտության և իր կատարման միջոցով»:

Ոչ ոք իր՝ ռեալիթի աստղի համբավից այնքան չի շահել, որքան Քիմ Քարդաշյանը, ով միլիարդատեր է դարձել իր գեղեցկության և հագուստի ապրանքանիշերի շնորհիվ։

Նրա «Skims» բրենդը 2023 թվականին գնահատվել է 4 միլիարդ դոլար, իսկ 2020 թվականին նա 200 միլիոն դոլարով Coty-ին վաճառել է KKW Beauty կոսմետիկ ընկերության 20 տոկոսը: Վարկանիշում 6-րդ տեղը զբաղեցնող Քիմի կարողությունը գնահատվում է 1,7 մլրդ դոլար։

Նրանից մեկ քայլ առաջ՝ հինգերորդ տեղում, Jay-Z-ն է իր 2,5 մլրդ դոլար կարողությամբ: Առաջին հիփ-հոփ միլիարդատերը 2021 թվականին իր շամպայնի ապրանքանիշի՝ Armand de Brignac-ի 50%-ը առնվազն 300 միլիոն դոլարով վաճառել է շքեղ ապրանքների հսկա LVMH-ին, իսկ իր կոնյակի D'Usse ապրանքանիշի բաժնետոմսերի մեծամասնությունը 2023 թվականին վաճառել է 750 միլիոն դոլարով:

Նա նաև բաժնետոմսեր ունի Uber և Block ընկերություններում: Նրա կապիտալում չի ներառվում կնոջ՝ Բեյոնսեի կես միլիարդ դոլար կարողությունը։

Հայտնի միլիարդատերերի հնգյակում ներառվել է Օփրա Ուինֆրին (2,8 միլիարդ դոլար):

Ցերեկային թոք-շոուի հաղորդավարուհին 2003 թվականին դարձել էր առաջին սևամորթ կին միլիարդատերը: Այդ ժամանակվանից նա իր բրենդը վերածել է մեդիա և բիզնես կայսրության՝ ներառյալ անշարժ գույքի ներդրումները և սեփական արտադրական ընկերությունը:

Մայքլ Ջորդանի կարողությունը 3,2 միլիարդ դոլար է։

Ջորդանը 2015 թվականին դարձավ առաջին միլիարդատեր մարզիկը, բայց դա նրա լեգենդար բասկետբոլային կարիերայի պատճառով չէր: Նա ավելի քան 1,8 միլիարդ դոլար է վաստակել բրենդների հետ գործնական համագործակցություններից, որոնցից ամենահայտնին Nike Jordan ապրանքանիշն է: Նա նաև շատ խելացի ներդրում էր կատարել 2010 թվականին՝ 175 միլիոն դոլարով գնելով NBA-ի «Շարլոտ Հորնեթս» թիմը: Այնուհետև՝ 2023 թվականի օգոստոսին, նա թիմը վաճառեց 3 միլիարդ դոլարով:

Սթիվեն Սփիլբերգ. կարողությունը՝ 4,8 միլիարդ դոլար։

Սփիլբերգը ցուցակին միացել է 1994 թվականին՝ դառնալով այնտեղ ներառված առաջին ռեժիսորը: «Ես խաղացող եմ»,-նույն տարի Forbes-ին ասել է նա: «Ես գրեթե տասը տարի աշխատավարձ չեմ ստացել»: Փոխարենը, նա բանակցում էր իր ֆիլմերի համախառն վաճառքի տոկոսը ստանալու համար, և «Ինդիանա Ջոնսի» ֆիլմաշարի շնորհիվ մինչ օրս ստանում է Universal թեմատիկ զբոսայգիներում վաճառված յուրաքանչյուր տոմսի մի մասը:

Ջորջ Լուկաս. կարողությունը՝ 5,5 միլիարդ դոլար։

«Աստղային պատերազմների» ռեժիսորը, ով առաջին անգամ որպես միլիարդատեր հանդես է եկել 1997-ին, աշխարհի ամենահարուստ հայտնի մարդն է՝ հիմնականում իր LucasFilm պրոդյուսերական ընկերության շնորհիվ, որը նա 2012-ին, ավելի քան 4 միլիարդ դոլարով, վաճառեց Disney-ին:

Աղբյուրը՝ style.news.am