Ֆրանսիայի նախագահի սոցիալիստ թեկնածու Ֆրանսուա Օլլանդի վրա Փարիզում՝ ընտրողների հետ հանդիպման ժամանակ, ալյուր են լցրել։ Ամբիոնի մոտ ելույթ ունեցող Օլլանդին է մոտեցել մի կին և սկսել պայուսակից ալյուր լցնել նրա վրա։ Թեկնածուի անվտանգության շխատակիցները տիկնոջը հեռացրել են սրահից։

Իր արարքը 45–ամյա Լիլիան բացատրել է նրանով, որ կեցության թերի օրենսդրության պատճառով մնացել է առանց գոյատևման միջոցների։

Ավելի ուշ Օլլանդն իր բլոգում գրել է, թե բողոքի շատ ուրիշ ձևեր կան, իսկ ինքը միշտ էլ պատրաստ է երկխոսության։

Սոցիալիստների թեկնածուն համարվում է գործող նախագահ Նիկոլա Սարկոզիի ամենագլխավոր մրցակիցը։

Ֆրանսիայի նախագահական ընտրությունների առաջին փուլը տեղի է ունենալու 2012թ. ապրիլին, իսկ երկրորդը՝ մայիսին։