Ազգային ժողովի պատգամավոր Կարեն Վարդանյանը՝ գործարար Հրանտ Վարդանյանի որդին, խորհրդարանում հարկային փաթեթի քննարկման ժամանակ դիմելով ՀՀ  ֆինանսների փոխնախարար Սուրեն Կարայանին, այսպիսի հայտարարություն է արել.

-Դուք խաբել եք հանձնաժողովին (ԱԺ տնտեսական հարցերի մշտական հանձնաժողով-խմբ): Վարդան Այվազյանն էլ գիտի: Առաջարկները ներկայացրել ենք և Դուք չեք ընդունել, բայց խոստացել էիք ու հիմա էլ ասում եք, թե առաջինից երկրորդ ընթերցում կընդունեք: Ես ձեզ չեմ հավատում: Այդ խոսակցությունը եղել է Վարդանի ներկայությամբ և Դուք էլ գիտեք: Եթե վերահսկելու խնդիր կա, ապա նախևառաջ պետք է վերահսկել հարկայինի ու մաքսայինի 2000 կաշառակեր աշխատակիցներին:  Այս ամենը աբսուրդ է: Սա կոմունիստական ոճ է՝ տնտեսությունը վերահսկելու: Ով գրել է այս փաստաթուղթը,  նա ուզում է հետ վերադարձնի  սովետական օբխսսի  տարիները: Եվ այս տարիների տնտեսական աճը կարող են մեկ տարում ջնջել, քանդել, և էլ չենք կարողանա վերականգնել: Որովհետև ես Ձեզ վստահում եմ, բայց չեմ վստահում վերահսկող մարմիններին: Երկրորդ, եթե կան հարկային տարեկան ստուգումները, էս տնտեսական տեռորը, հարյուրերոդ անգամ եմ ասում, ինչների՞դ էր պետք: Բերել կապել խոշոր արտադրողի վզին էս ամենակարևոր պահի՝ տնտեսական ճգնաժամի ընթացքում: Երրորդ. քանի որ կան խոշոր բիզնեսմեններ, օլիգարխներ մաքսային կոմիտեում, առաջարկում եմ ստեղծել առանձին անկախ վերահսկող մի պետական մարմին, որը կենթարկվի կա՛մ անմիջապես երկրի նախագահին, կա՛մ վարչապետին: Չենթակվի հարկային-մաքսային կոմիտեին ոչ էլ այնտեղի կաշառակերներին: Որ չկարողանան իրենց մրցակիցներին ճնշել, լուծարել և սննկացնել:

Կարեն Վարդանյանը նաև այսպիսի հարցադրում է արել.

-Էս տնտեսական տեռորով, էս աբսուրդ նախագծով ո՞նց ենք մենք մեր սփյուռքահայ ընկերներին կամ արտասահմանցիներին համոզելու և բերելու, որպեսզի նրանք Հայաստանում ներդրումներ անեն: