«Հայաստանի քրիստոնեա դեմոկրատական միություն» կուսակցության ղեկավար Խոսրով Հարությունյանը, խոսելով ԱԺ-ում քննարկվող հարկային օրենսդրությունում առաջարկվող փոփոխությունների մասին, ասել է, որ այն կարող է կոռուպցիայի մի նոր հնարավորություն ստեղծել։

- Այս նախաձեռնությունն ամենահաջողվածը չէ։ Հարկային մարմնի այն ներկայացուցիչները, ովքեր պետք է վերահսկեն խոշոր գործարարաների  գործունեությունը, շատ հանգիստ կարող են նաև կաշառվել։ Արդյունքում՝ սպասվող արդյունքը կարող է չլինել,- «7 օր»-ի հետ զրույցում ասել է նա։

Խոսրով Հարությունյանի խոսքերով՝ փոփոխությունների ընդունվել-չընդունվելն այս պահին  այդքան կարևոր չէ։

- Ելնելով այն ելույթներից, որոնք տեղի են ունենում ԱԺ-ում, պետք է որ չընդունվի։ Բայց դա չէ կարևորը։ Վերջին հաշվով՝ կարող է ընդունվել, բայց ստեղծվի այնպիսի իրավիճակ, որ հետո ստիպված կլինեն այդ օրենսդրական ակտը փոփոխության ենթարկել,-ասել է նա։

Խոսրով Հարությունյանը պնդում է, որ այն գործառույթը, որը խոշոր առևտրային կազմակերպություններում իրականացնելու է հարկային մարմնի ներկայացուցիչը, Հարկային տեսչության օպերատիվ վարչությանն է վերաբերում։