Լրահոս

01.06.2009 09:13


Դատախազության կողմից ստուգվում են ընտրախախտումների վերաբերյալ ահազանգերը

Ընտրական հանձնաժողովների, ԶԼՄ-ների ներկայացուցիչների, դիտորդների, վստահված անձանց աշխատանքներին խոչընդոտելը, ընտրողի կամքի ազատ արտահայտմանը խոչընդոտելը, քվեարկության արդյունքները կեղծելը քրեորեն հետապնդելի արարքներ են և դատախազությունը հետամուտ է լինելու, որպեսզի այդօրինակ արարքների վերաբերյալ յուրաքանչյուր ահազանգ գրանցվի և ստուգվի:

Օրենքով սահմանված կարգով ընթացք են տրվում ընտրախախտումների վերաբերյալ բոլոր ահազանգերին՝ ինչպես բանավոր ստացված, այնպես էլ ընտրախախտումների վերաբերյալ ԶԼՄ-ներով տարածված տեղեկատվությանը, կուսակցությունների, դաշինքների նախընտրական շտաբերի հայտարարություններին:

Հանձնարարություն է տրվել կառուցվածքային ստորաբաժանումներին՝ հսկողություն իրականացնել, որպեսզի ընտրախախտման վերաբերյալ ԶԼՄ-ներով տարածվող յուրաքանչյուր տեղեկատվություն օրենքով սահմանված կարգով ստուգվի:

Ստուգման արդյունքներով չեն հիմնավորվել ընտրակաշառքներ բաժանելու, մահացած անձանց «քվեարկելու» վերաբերյալ տվյալները:

Մասնավորապես՝

  • ՀԱԿ-ը տարածել էր, թե թիվ 11/21 ընտրական տեղամասում  «քվեարկել է» մահացած Գևորգ Թովմասյանը:

Կատարված ստուգմամբ պարզվել է, որ ընտրացուցակներում  Գևորգ Թովմասյան անուն-ազգանունով  անձնավորություն ներառված չէ, հետեւապես քվեարկությանը չի մասնակցել:

  • «Հայ Ազգային Կոնգրեսի» կողմից  տարածվել էր, թե 2009թ. մայիսի 31-ին Ավանի շախմատի դպրոցի մոտ՝ ժամը 8:00-ի սահմաններում, բաժանվել է  ընտրակաշառք: Ահազանգը ստուգելու համար  ոստիկանության   Նոր Նորքի բաժնի  աշխատակիցներն այցելել են  Ավան համայնքի Շախմատի դպրոց, որտեղ տեղակայված է թիվ 1/11 ընտրական տեղամասը:

Դեպքի կապակցությամբ բացատրություններ են վերցվել  ընտրատեղամասի հարակից  շենքերի բնակիչներից  եւ թիվ 1/11  ընտրատեղամասի նախագահ Դավիթ Հունանյանից:  Բնակիչները հայտնել են, որ  2009թ. մայիսի 31-ին, ժամը 7:30-ից գտնվել են շախմատի դպրոցի դիմացի տաղավարում  եւ չեն տեսել, որ որեւէ մեկը քաղաքացիներին  ընտրակաշառք բաժանի  կամ նման առաջարկ արվի: Թիվ 1/11 ընտրատեղամասի նախագահը  նույնպես  հերքել է բնակիչներին ընտրակաշառք բաժանելու հանգամանքը:

Կատարվում է հետաքննություն:

  • Հայ Ազգային Կոնգրեսի» կողմից  տարածվել էր, թե  2009թ. մայիսի 31-ին Նոր Նորքի թիվ 2 /4 ընտրատեղամասի մոտ՝  ժամը 9:00-ի սահմաններում,  կայանված «Գազել» մակնիշի միկրոավտոբուսից ընտրակաշառք  է բաժանվում:  Տեղեկությունը պարզելու համար ոստիկանության Նոր Նորքի  բաժնի աշխատակիցները  այցելել են թիվ 2/4  ընտրատեղամաս: Բացատրություն է վերցվել նշված  ընտրատեղամասի դիմաց մանրածախ առեւտրով զբաղվող  Մ. Սարուխանյանից:  Վերջինս հայտնել է, որ 2009թ.  մայիսի 31-ին ՝ ժամը 08-ից  սկսած թիվ 2/4 ընտրատեղամասի մոտ սուրճ է վաճառել եւ այդ ընթացքում որեւէ «Գազել»  մակնիշի միկրոավտոբուսից  ընտրակաշառք բաժանելու դեպքեր չեն եղել: ՀԱԿ-ի ներկայացուցիչ  Մարգարիտա Հարությունյանը  հրաժարվել է գրավոր բացատրություն տալուց, սակայն բանավոր հայտարարել է, որ  ինքն ամբողջ օրվա ընթացքում  գտնվել է թիվ 2/4 ընտրատեղամասում  ու դրա հարակից տարածքում  եւ ընտրակաշառք բաժանելու վերաբերյալ  որեւէ տեղեկություն չունի, դրա վերաբերյալ որեւէ բողոք չի ստացել: Բանավոր հայտարարության վերաբերյալ կազմվել է արձանագրություն, ինչը ստորագրվել է հետաքննիչի եւ Մ.Հարությունյանի կողմից:

ՀՀ գլխավոր դատախազության
մամուլի ծառայություն

Այս խորագրի վերջին նյութերը