Մեկնարկել է «Հայաստանի փոքրիկ երգիչներ» (ՀՓԵ) մանկական երգչախմբի եզակի համերգային շրջագայությունը Ճապոնիա, 40 օրերի ընթացքում երգչախումբը ելույթ է ունենալու 18 քաղաքներում` ներկայացնելով հայ և համաշխարհային երգարվեստի գոհարները:

Տիգրան Հեքեքյանի ղեկավարած ՀՓԵ երգչախումբը Ճապոնիայում համերգային լայնամասշտաբ շրջագայության հրավերը ստացել է ճապոնական հայտնի «Մին Օն» կազմակերպության կողմից, որը Ճապոնիայում տարեկան 1000-ից ավելի համերգ է կազմակերպում, որոնց մեկ երրորդը հրավիրված խմբեր և մենակատարներ են աշխարհի տարբեր երկրներից: Կազմակերպությունն առաջնորդվում է հստակ սկզբունքով. հրավիրված խմբերն ու երաժիշտները, բացի համապատասխան համբավից և ճանաչումից, պետք է կարգով ավելի բարձր լինեն, քան նմանատիպ ճապոնական խմբերը:

«Հայաստանի Փոքրիկ Երգիչների» այս 40-օրյա շրջագայությունն իր մեծությամբ, նշանակալիությամբ և կազմակերպվածության բարձր մակարդակով կարող է համեմատվել, թերևս, միայն 1995- ին Եվրոպայի մի քանի երկրներում և ԱՄՆ-ի 20 նահանգներում երգչախմբի ունեցած 50 -օրյա հաղթարշավի հետ:

Աշխարհահռչակ մեր երաժշտախումբն արդեն իսկ ելույթ է ունեցել Յամագատա, Յոկոհամա, Սանո, Տոչիգի, Կիտակյուսյու, Մարուգամե քաղաքների ամենախոշոր` 1400 – 2000 տեղանոց համերգադահլիճներում: Հասցրել են այցելել անգամ օրերս աղետի ենթարկված Կյուսյու կղզին և երգել ջրհեղեղից տուժած ճապոնական ընտանիքների համար:

Ճապոնացի հանդիսատեսի ոգևորության և հիացմունքի արձագանքները Հայաստան են հասնում: Ընդունելությունը, որ Ծագող արևի երկրում ցույց են տալիս մեր անվանի խմբավարին և նրա սաներին, գերազանցում է բոլոր սպասելիքները:

Շրջագայությունը նվիրված է հայ-ճապոնական դիվանագիտական հարաբերությունների 20-ամյակին և հայ գրատպության 500-ամյակին: Առջևում են նորանոր քաղաքներ և լավագույն դահլիճներ:

Երգչախումբը Հայաստան կվերադառնա օգոստոսի 14-ին: