Արմավիրի մարզ Մայիսյան գյուղի միջնակարգ դպրոցի աշակերտ, «Օլիմպիականները դպրոցականների աչքերով» թեմայով շարադրությունների մրցույթի  3-րդ կարգի մրցանակակիր Դավիթ Հակոբյանը ԿԳՆ-ում տեղի ունեցած մրցանակաբաշխության արարողության ժամանակ  իր դպրոցի անունց խնդրանքով է հանդես եկել։

- Մեր դպրոցի կողքին գործում է մարզադահլիճ, բայց այն լավ վիճակում չէ։ Խնդրում ենք օժանդակել՝ ունենալու կանաչապատ մարզադաշտ,-ասել է Դավիթ Հակոբյանը։

Արմեն Աշոտյանն էլ ի պատասխան խոստացել է այցելել այդ դպրոց և տեղում ծանոթանալով խնդրին՝ լուծում գտնել։

- Ես չեմ խոստանում, որ ձեր բարձրացրած հարցը տեղում կլուծեմ, բայց խոստանում եմ՝ սեպտեմբերին առաջինը կայցելեմ ձեր դպրոց, և տեղական իշխանությունների հետ կփորձենք տեղում լուծում գտնել,-ասել է նա։ Նախարարը նաև նշել է, որ սկսելու են  մի ծրագիր՝ կապված  հանրակրթական դպրոցներում բուժկետերի հետ։

-Որպես կանոն,  այդ բուժկետերը լավ վիճակում չեն, և կարևոր ենթակառույցներ լինելով՝ պետք է մեր ուշադրության կենտրոնում լինեն։ Նման առաջարկով ես դիմել եմ առողջապահության նախարարությանը,  որպեսզի դպրոցներում բուժկետերն ապահովված  լինեն համապատասխան պարագաներով,-ասել է նա։