Քաղաքական

18.10.2012 14:06


Հիասթափված գյուղապետը հրաժարական տվեց. նա կհեռանա Հայաստանից

Հիասթափված գյուղապետը հրաժարական տվեց. նա կհեռանա Հայաստանից

Այսօր ՀՀ կառավարությունն ընդունեց Գեղարքունիքի մարզի Երանոսի գյուղական համայնքի ղեկավարի լիազորությունները վաղաժամկետ դադարեցնելու, համայնքի ղեկավարի արտահերթ ընտրություն նշանակելու, անցկացնելու և ընտրության նախապատրաստման ու անցկացման ծախսը ֆինանսավորելու որոշում։

Ինչպես ավելի վաղ տեղեկացրել էինք, Երանոսի գյուղապետ Գագիկ Խանսանամյանը որոշել էր հրաժարական տալ, քանի որ չի կարող այլևս այսպես ապրել և աշխատել։ 

«Ստիպված եմ, կան որոշակի հանգամանքներ: Իմ դուրս գալու նպատակը Հայաստանից գնալն է… Անկեղծանամ, ասեմ՝ ճիշտ է, այսօր մեր օրենքներով երբ գյուղացուն հող են տալիս, դա համարում են աշխատանքով ապահովված: Գյուղացին այդ հողը պիտի մշակի, անասուն պահի, երբ ո՛չ հողը, ո՛չ անասունը այսօր բավարար եկամուտ  չեն բերում: Հիմնական մեր գյուղատնտեսության մթերքը եղել է կարտոշկան, կաղամբը և կաթնամթերքը:

Միայն ունենք Մալաթիայի շուկան: Գյուղացին բերում, մեքենայով կանգնում էր, շուկայի տերը գինը ասում էր՝ 70, 80 դրամ, երբ այդ նույն կարտոշկեն քաղաքացու վրա վաճառում են 150-160, 200 դրամով: Ձեռ տալիս է՝ տուր, ձեռ չի տալիս՝ գնա: Տուժում էր և՛ գյուղացին, և՛ քաղաքացին»,– «ԷկոԼուր»–ին իրավիճակը ներկայացրել էր Գ. Խանսանամյանը:

Նա նաև նշել էր, որ այսօր իրենց հողերի մոտ 20-30 տոկոսն է մշակվում, իսկ վիճվարչության թվերը իրականությանը չեն համապատասխանում:

«2003թ.մեր գյուղում, եթե թվերի մեջ չսխալվեմ, 2500 գլուխ խոշոր կենդանիներ ենք ունեցել, այսօրվա դրությամբ 1500 է: Գնալով չի զարգանում, որ ցույց է տալիս մեր գյուղնախարարը, թե զարգացում կա, տարեկան 7 տոկոս, 10 տոկոս աճ կա գյուղատնտեսությունում: Այդ թվերը մեզ տրվում են, մենք տալիս ենք… Գյուղատնտեսությունը բոլոր ժամանակներում էլ վնասով է աշխատում: Երբ որ մեր իշխանությունը այսօր աչք է փակում  դրա վրա, պահանջում է, որ գյուղատնտեսությունը զարգանա, բայց դրա հետ միասին կառավարությունը, գյուղնախարարությունը ոչ մի աջակցություն չեն ցուցաբերում գյուղացուն, որտեղի՞ց զարգանա: Սուտ բաներ են, սուտ թվեր են:
Ես գյուղացի եմ, ես ունեմ ֆերմա, իմ սեփական տնտեսությունը, այս պահի դրությամբ ես վերցրել եմ 100 հազ. դոլարի չափով վարկ բանկից,  որի տարեկան տոկոսը կազմում է 22 տոկոս, երբ որ մենք լավ գիտենք, որ շահույթը 20 տոկոս չի հասնում… Ես ոչ թե պաշտոնով եմ  փող աշխատում, ես ուզում էի կողքից իմ գործը դնել, իմ ընտանիքի գոյությունը պաշտպանել: Բայց ցավոք սրտի, ինչ փորձեցի, չստացա, չկարողացա, չարդարացրեց: Գյուղատնտեսությամբ աշխատելը ձեռնտու չէ... Մենք ունենք գյուղից տարբեր տեղեր աշխատող 207 երիտասարդներ, եթե չլինի դուրսը, եթե չլինի Ռուսաստանը, նամանավանդ մեր գյուղերը և կողքի գյուղերը սովամահ են լինելու: Ի շնորհիվ դրսի, այսօր մեր վիճակը, այս ենթաշրջանի վիճակը լավ է… Ցավոք սրտի, սա մեր դառը իրականություն է: Ա՛յս երկրում, շեշտում եմ։ Ես սպասում եմ օր առ օր, մեկ–երկու օրից, կառավարության որոշումը դուրս կգա: Որից հետո ես վայր եմ դնում իմ լիազորությունները, հանձնում եմ տեղակալին իմ պաշտոնը, երկու ամիս նա կկառավարի, մինչև կլինեն նոր ընտրություններ»,–ասել էր նա:

7or.am

Այս խորագրի վերջին նյութերը