Ինչպես արդեն տեղեկացրել էինք, վաղը վարչապետ Տիգրան Սարգսյանի մոտ կկայանա կոռուպցիայի դեմ պայքարի խորհրդի նիստ: «Zham.am»–ի փոխանցմաբ՝ ԱԺ ԲՀԿ խմբակցության քարտուղար Նաիրա Զոհրաբյանը հայտնել է, որ «Բարգավաճ Հայաստանը» չի մասնակցելու այդ նիստին։

««Բարգավաճ Հայաստանը» մշտապես հայտարարել է, որ կարևորում է կոռուպցիայի դեմ պայքարը, և այդ կոնտեքստում մենք այդ խորհրդին առաջարկում ենք օրակարգի թիվ մեկ հարցերից մեկը դարձնել հետևյալը. «Հազարամյակի մարտահրավերներ» ծրագրով գյուղական բնակիչներին այդ ի՞նչ դասախոսություններ են կարդացվել, որոնց համար անհրաժեշտ է եղել ծախսել 16,6 մլն ԱՄՆ դոլար: 
Սա մենք կարևոր հարց ենք համարում, մեր քաղաքացիները պարտավոր են իմանալ, թե այդ ինչ դասախոսություններ են, որոնց համար նման գումարներ են ծախսվել: Եթե այդ խորհուրդը օրակարգի առաջնային խնդիրներից մեկը դարձնի այդ հարցը, ապա մենք կքննարկենք վերջինիս աշխատանքներին մասնակցելու խնդիրը:
Ինչ վերաբերում է վաղվա նիստին, ապա, ինչպես տեղեկացվել է, օրակարգում երկու հարց ունի`  

1. Հակակոռուպցիոն քաղաքականության անարդյունավետության հիմնապատճառները/զեկուցող` Գեորգի Կուտոյան, 

2. Բարձրաստիճան պաշտոնատար անձանց էթիկայի հանձնաժողովի կայացման խնդիրները /զեկուցող` Էմիլ Բաբայան: 

Մենք հարգանքով ենք վերաբերվում բոլոր զեկուցողներին, բայց նրանց դասախոսությունները լսելու կարիք չունենք: Մենք կարծում ենք, որ պետք է կոնկրետ գործ անել, իսկ  կոնկրետ գործը կլինի այն, որ հակակոռուպցիոն այդ խորհուրդը քննարկի 16,6 միլիոն դոլարով դասախոսություններ կարդալու հարցը: Եթե կընդունեն օրակարգի մեր այս առաջարկը, մենք հաջորդ նիստերից կմասնակցենք այդ աշխատանքներին: Վաղը մեր ներկայացուցիչը ձեռնպահ կմնա այդ խորհրդի աշխատանքներին մասնակցելուց»,–ասել է Ն. Զոհրաբյանը։
Տեղեկացնենք, որ ՀԱԿ–ը ևս հայտարարել է հակակոռուպցիոն միջոցառմանը չմասնակցելու մասին, իսկ ահա «Ժառանգության» ներկայացուցիչները շտապել են հայտարարել, որ մասնակցելու են։