Այսօրվա ասուլիսին ՀՀ գլխավոր թունաբան Միքայել Գաբրիելյանը հայտնել է, որ  այս ամսվա սկզբից մինչ օրս սուր թունավորման ախտանիշներով Երևանի բժշկական կենտրոններ է դիմել 29 հիվանդ, այդ թվում՝ ալկոհոլային թունավորման 8, դեղորայքային 7, շմոլ գազից թունավորման 7 դեպքերով:

 «Արդեն երրորդ տարին է՝ ալկոհոլային թունավորման դեպքերի աճ է նկատում: Ընդ որում՝ տարիքային շեմն էլ է նվազել: Կան նաև կանայք: 2012 թվականին 300 դեպք է գրանցել, 2011-ին՝ 299։ Ալկոհոլային թունավորման դեպքերի պատճառը ոչ թե խմիչքի որակն է, այլ՝ քանակը»,–ասել է բանախոսը։

Դեղորայքային թունավորման դեպքերի մասին էլ գլխավոր թունաբանը նշել է, որ խնդիրը դարձյալ ոչ թե որակն է, այլ չարաշահումը:

Շմոլ գազից թունավորումների մեծ մասի պատճառն էլ կենցաղային անվտանգության կանոնները չպահպանելն է:

7or.am