Հայաստանում այս տարվա առաջին օտարերկրյա այցով գտնվող Վրաստանի վարչապետ Բիձինա Իվանաշվիլին իր հայաստանցի պաշտոնակցի հետ առանձնազրույցից հետո պատասխանել է նաև լրագրողների հարցերին։ Նա նշել է, որ Վրաստանը պատրաստակամ է հարաբերությունները զարգացնել Հայաստանի հետ։

Նշենք, որ Բիձինա Իվանիշվիլիին բարկացրել է վրացական «Ռուսթավի-2» հեռուստաընկերության թղթակցի հարցը Վրաստանի ԱԳ նախարար Մայա Փանջիկիձեի հայտարարության վերաբերյալ: Նա ընդգծել է, որ այդ մասին անհրաժեշտ պարզաբանումն արդեն տրված է, և նախարարի խոսքն աղավաղել են լրատվամիջոցները։

–Հարցը փակված է,–թեման փակել է Իվանիշվիլին։

Խոսելով Ադրբեջանի նախագահ Իլհամ Ալիևի հետ ունեցած իր հանդիպումից՝ Վրաստանի վարչապետը հայտնել է, որ իրենք անդրադարձել են ԼՂ–ի խնդրի կարգավորմանը, և այդ հարցում Ալիևի դիրքորոշումն ինքը փոխանցել է Տիգրան Սարգսյանին։

–Խնդիրն իրոք բարդ է և ապագայում էլ, կարծես, մոտ ապագայում այդպիսին է մնալու: Իմ ցանկությունն ու կոչն է, որ երկու պետությունները հնարավորություն գտնեն հարցը խաղաղ ճանապարհով կարգավորելու համար,–նշել է Իվանիշվիլին:

ՀՀ վարչապետն իր հերթին Իվանիշվիլիին  շնորհակալություն է հայտնել այդ հարցում հավասարակշիռ դիրքորոշման համար։

–Գաղտնիք չէ, որ ԼՂ–ի կարգավորման շուրջ արված այս կամ այն հայտարարությունները շատ հաճախ աղավաղվում են: Շնորհակալ ենք վրացի գործընկերներին, որ աղավաղումների դեպքում օպերատիվ արձագանքում են,–ընդգծել է Տիգրան Սարգսյանը:

Խոսք է եղել նաև Հայաստան-Վրաստան-Աբխազիա-Ռուսաստան երկաթգծի գործարկման մասին։ Իվանիշվիլին նշել է, որ այժմ դրա հնարավորությունն ավելի մեծ է, և հիմնական խնդիրը Ռուսաստանի հետ է.

–Մենք ջանք ենք գործադրում հնարավորինս արագ վերակագնելու Ռուսաստանի հետ հարաբերությունները: Երկաթգծի աշխատանքի վերակագնումը կապված է ընդհանուր խնդիրների հետ, բայց եթե կամք լինի, այն կարելի է լուծել ավելի շուտ:

Տիգրան Սարգսյանն էլ ընդգծել է, որ իրենք արձանագրել են՝ հայ-վրացական հարաբերություններում չկա մի հարց, որը հնարավոր չէ լուծել քննարկումների ճանապարհով:

Կողմերը նաև ստորագրել են մշակութային ու մաքսային ոլորտներում համագործակցության մասին հուշագրեր։

Ի դեպ, հանդիպմանը ներկա լրագրողները փոխանցում են, որ Հայաստանի և Վրաստանի վարչապետերի մամուլի ասուլիսի թարգմանիչը շատ դեպքերում ճիշտ չի թարգմանել բանախոսների մտքերը, և դա, հնարավոր է, տարընթերցման պատճառ դառնա։

7or.am