ՀՀ նախագահի թեկնածու, «Ազգային համաձայնություն» կուսակցության նախագահ Արամ Հարությունյանն այսօր լրագրողների հետ հանդիպման ժամանակ անդրադարձել է նախագահի մեկ այլ թեկնածու, ԱԻՄ առաջնորդ Պարույր Հայրիկյանի դեմ կատարված մահափորձին։ Արամ Հարությունյանը, ով նույնպես այցելել է հիվանդանոց, և ում որդու քավորը հենց Պարույր Հայրիկյանն է, կատարվածի մասին միանշանակ կարծիք հայտնելը դեռ վաղ է համարել։

–Դեպքից շատերը կարող են օգտվել, բայց ժամանակը ցույց կտա, թե սա ո՞ւմ էր ձեռնտու և ո՞վ է օգուտներ քաղել: Ես իմ տեսակետն ունեմ, բայց ավելի լավ է մի քիչ սպասենք: Բայց մի բան հաստատ կարելի է ասել՝ ամեն ինչ միարժեք չէ։ Սա ինչ–որ կենտրոնի կողմից լուրջ հաշվարկված քայլ է։ Սա մեկքայլանոց բան չէ. քաղաքականության մեջ մեկքայլանոց օպերացիաներ չեն լինում,–ասել է Ա. Հարությունյանը:

Հարությունյանը փոխանցել է Հայրիկյանի խոսքերը՝ եթե իր մոտի զենքը հաներ, շատ հնարավոր է՝ ամեն ինչ շատ ավելի ողբերգական ավարտ ունենար, քանի որ ինքը փորձել է դիմադրել մահափորձ կատարողին։ Այդ պատճառով էլ առաջին կրակոցը վրիպել է։

7or.am