ՀՀ նախագահի թեկնածու Արման Մելիքյանը այսօր հրավիրված ասուլիսում նշել է, որ ԿԸՀ–ն լրացուցիչ նիստ է գումարելու իր դիմումը քննելու համար:

–Երեկ հանձնաժողովը քննում էր իմ դիմումը, բայց նրանք կարծես որևէ կերպ չէին կարողանում ընկալել ընտրակեղծարարությունը կանխելու` իրենց ուղղված իմ պահանջը: Դիմումն ավելի մանրամասն քննարկելու համար լրացուցիչ նիստ գումարելու որոշում եղավ,-ասել է թեկնածուն:

Արման Մելիքյանը պահանջում է հրապարակել ՀՀ անկախացումից ի վեր ՀՀ քաղաքացիություն ստացած երկքաղաքացիների, ՀՀ-ից հեռացածների, ՀՀ քաղաքացիությունից հրաժարվածների պաշտոնական թվերը:

Արման Մելիքյանն անդրադարձել է նաև ՀՀ նախագահի մեկ այլ թեկնածու Արամ Հարությունյանի կոչին՝  ինքնաբացարկ հայտնելու մասին, և նշել, որ հարգում է կոչ անելու նրա իրավունքը, բայց չի միանալու, քանի որ նպատակահար չի համարում:

Նախագահ ընտրվելու դեպքում էլ Արման Մելիքյանը նախևառաջ կայցելի Մատենադարան.

–Այն խորհրդանշում է մեր լեզվի հզորությունը, մշակույթը, գիտությունը, պատմությունը, ազգի ինտելեկտուալ պոտենցիալը: Ինտելեկտը պետք է առաջ շարժի մեր պետականությունը:

7or.am