ՀՀ նախագահի թեկնածու Պարույր Հայրիկյանը ՍԴ–ից իր դիմումը վերցնելը հիմա էլ բացատրում է հացադուլ հայտարարծ նախագահի թեկնածու Անդրիաս Ղուկասյանին խղճալով։

Այսօր հրավիրված ասուլիսում Հայրիկյանը հայտարարել է, թե երբ մոտեցել է Անդրիասին ու ասել՝ հնարավոր է միասնական թեկնածու լինի, դուրս կգա՞ս հացադուլից, որովհետև մահվան շեմին ես կանգնած, Ղուկասյանը պատասխանել է, որ մինչև քվեարկության օրը շարունակելու է իր հացադուլը։

–Ես նրան հավատացի և իմ խղճի վրա զգացի այդ ծանրությունը, որովհետև ընտրությունները հետաձգելու դեպքում զոհասեղանին եմ դնելու Անդրիասին,- ասել է Պարույր Հայրիկյանը։

Նա նաև նշել է, որ խանդից, բարդույթից, թե չգիտեմ ինչից դրդված՝ իր հրապարակային դիմումը Հրանտ Բագրատյանը որակեցին որպես գաղտնի հանդիպումների հրապարակում.

–Այ դու ո՞վ ես, որ ես քո հետ գաղտնի խոսակցություն ունենայի, դու գո՞ղ ես, թե՞ ավազակ, ինչի՞ց ես վախեցած: Էդ ի՞նչ ՀՀՇ-ական մոտեցում է,–Բագրատյանին դիմելով՝ նշել է Հայրիկյանը՝ միաժամանակ Բագրատյանի նախընտրական ծրագիրն անվանելով սովխոզի նախագահի ծրագիր.

–Ընտրարշավում պաշտոն ունեցող երկո՛ւ մարդ կա՝ Հրանտ Բագրատյան ու Սերժ Սարգսյան: Եվ պաշտոն ունեցողը խոսում է պաշտոն չունեցողի մասին, խոսում է իշխանությունների հետ համագործակցության մեջ մտած մարդը: Բան ու գործ չունե՞ս Հրանտ: Ես նոր Հրանտ Բագրատյան բացահայտեցի և տխրեցի։ Ինքը ինձ հիշեցրեց, որ իր թիմակիցներին է դավաճանել, իրեն  պառլամենտական աթոռ տված Լևոն Տեր-Պետրոյանին չհարցրեց՝ ի՞նչ կասես թեկնածություն եմ ուզում դնեմ: Պրիմիտիվ մարդիկ են քաղաքական դաշտը բաժանում իշխանության և ընդդիմության: Եթե իշխանությունը չարիք է՝ ուրեմն Բագրատյանը 4 տարի չարիք է եղել՝ լինելով վարչապետ: Խորհուրդ եմ տալիս մանկապարտեզային մակարդակից բարձրանալ:

Ինչ վերաբերում է Սերժ Սարգսյանին հաղթանակից հետո շնորհավորելուն, Հայրիկյանը նշել է.

–Ում հետ էլ նարդի եմ խաղում և հաղթում է, շնորհավորում եմ:

7or.am