Վրաստանի նախագահ Միխայիլ Սահակաշվիլին Երևան կատարելիք այցի նախօրեին Հայաստանի Հանրային հեռուստատեսությանը տված հարցազրույցում մասնավորապես ասել էր. «Ինչ-որ արհեստական բան կա, երբ ամեն անգամ խոսվում է Վրաստանի նախագահի Հայաստան կատարած պաշտոնական այցի մասին, քանի որ մեր հարաբերությունները շատ ավելին են քան երկու երկրների միջև պաշտոնական հարաբերությունները։ Հայաստանն ու Վրաստանը եղբայրական պետություններ են, որոնց ճակատագրերը միահյուսված են»,-հայտարարել է Վրաստանի նախագահը։

Հիշեցնենք, որ մինչև Սահակաշվիլիի Հայաստան կատարած երկօրյա այցը, որոշակի լարվածություն էր առաջացել հայ-վրացական հարաբերություններում՝ Ջավախքի հայ ուսուցիչներին արգելվեց վերապատրաստվելու համար գալ Հայաստան, ԱԺ պատգամավոր Շիրակ Թորոսյանին վրաց սահմանապահները, վկայակոչելով «վերևից եկած հրահանգը», չթողեցին հատել սահամնը։