«Այսօր կարող եմ միայն ափսոսանքս հայտնել այն կապակցությամբ, որ իշխանությունը չցանկացավ ապահովել ընտրությունների օրինականությունը, իսկ մնացյալ թեկնածուներն իրենց գործողություններով` քվեարկությանը մասնակցելով, փաստորեն աջակցեցին ընտրակեղծարարներին և այսօր անպտուղ վեճեր են վարում կեղծ ընտրաթվաբանության շուրջ, խոսում են ՀՀ չորրորդ նախագահի հայտնվելու մասին այն դեպքում, որ 1996 թվականից այս կողմ Հայաստանում ընտրված Նախագահի ինստիտուտը փոխարինված է դե-ֆակտո կառավարիչի ինստիտուտով: Այսպիսով չորրորդ Նախագահի մասին խոսացողները օրինականացնում են ՀՀ-ում առ այսօր հաստատված անօրինությունը: Կրկին ընդգծեմ. կեղծված ընտրություններում չկան հաղթողներ` բոլորը պարտված են: Հայաստանում իշխանության լեգիտիմացման իրավական հնարավորությունները սպառված են և խնդիրը կարող է լուծում ստանալ միայն քաղաքական թափանցիկ և փոխպարտավորեցնող համաձայնությունների հիման վրա: Իմ փետրվարի 13-ին հրապարակված իմ այս հայտարարությունը գուցե կոգնի հետադարձ հայացք գցել և ինչ-որ բաներ նորովի վերաիմաստավորել»։