Խորհրդարանն այսօրվա նիստի մեկնարկին մեկ րոպե լռությամբ հարգեց 25 տարի առաջ Սումգայիթում տեղի ունեցած ջարդերի անմեղ զոհերի հիշատակը:

ԱԺ նախագահ Հովիկ Աբրահամյանը, մասնավորապես, նշեց, որ 1988թ. Ադրբեջանի հայաբնակ Սումգայիթ քաղաքում պետական մակարդակով կազմակերպված և իրականացված հանցագործության հետևանքով սպանվեցին հայազգի հարյուրավոր բնակիչներ, բռնությունների ենթարկվեցին և բռնի տեղահանվեցին: «Թե´ Սումգայիթում, թե՛ երկու տարի հետո Բաքվում հայերի նկատմամբ իրականացվեց իսկական ցեղասպանություն, որը հետևանք էր ադրբեջանական այլատյացության և հայատյացության՝ երևույթներ, որոնք, ըստ նրա, այսօր էլ շարունակվում և իշխանությունների մակարդակով աջակցություն են ստանում Ադրբեջանում»,–ասել է ԱԺ նախագահը։